ჩვენ გვყავს დიასპორის ბევრი წარმატებული წარმომადგენელი და მათთვის საქართველოს ხელისუფლების კარი ღიაა, – ამის შესახებ საქართველოს პრემიერ-მინისტრმა, ირაკლი ღარიბაშვილმა განაცხადა.
მისი თქმით, საქართველო არის მათი სამშობლო და საქართველოს ხელისუფლება უკიდურესად არის დაინტერესებული, რომ ეს ადამიანები სამშობლოში დაბრუნდნენ და ქვეყნის განვითარებაში მაქსიმალურად მოხდეს მათი ჩართულობა.
“მე ვერ წარმომიდგენია, როგორ უნდა მოხდეს ქვეყნის განვითარება მათი ჩართულობის გარეშე, როგორც უნდა ვიგრძნოთ თავი ბედნიერად და როგორ უნდა შევიგრძნოთ მათ გარეშე შესაძლებლობები, რომელიც ქვეყანაში არსებობს”, – განაცხადა ღარიბაშვილმა.
მისივე თქმით, ძალიან უჭირს გაუგოს იმ ადამიანებს, რომლებიც წლების განმავლობაში სამშობლოში არ ჩამოსულა.
“ქართულ მიწას აქვს განსაკუთრებული მიზიდულობა, თითოეულ ქართველს კი აქვს განსაკუთრებული გრძნობა და ნოსტალგია სამშობლოს მიმართ. ძალიან მიჭირს გავუგო იმ ადამიანებს, რომლებიც წლების განმავლობაში სამშობლოში არ დაბრუნებულან. ისინი ელოდებიან რაღაც განსაკუთრებულის მოხდენას, მაგრამ ამ განსაკუთრებულს არ უნდა დაველოდოთ. თითოეული დღე ჩვენი სამშობლოსთვის არის განსაკუთრებული და გადამწყვეტი. როგორ შეიძლება, რომ ჩვენი დიასპორა რაღაც განსაკუთრებულს ელოდებოდეს. ჩვენს ხელთ არის მომავალი”, – განაცხადა ღარიბაშვილმა.
დღესვე, დიასპორის საკითხებში სახელმწიფო მინისტრმა, გელა დუმბაძემ პრემიერ-მინისტრს დიასპორის მხარდაჭერისთვის მედალი გადასცა.
