ირაკლი ღარიბაშვილი თბილისში ვიზიტად მყოფ ლიტვის პრემიერ-მინისტრს ხვდება. მთავრობის ადმინისტრაციაში დახვედრის ოფიციალური ცერემონია უკვე გაიმართა, რის შემდეგაც პირისპირ შეხვედრა დაიწყო.
მოგვიანებით, გაიმართება დელეგაციების გაფართოებული მოლაპარაკებები, რის შემდეგად, ორი ქვეყნის პრემიერ-მინისტრი მედიისთვის ერთობლივ განცხადებებს გააკეთებენ.
შეხვედრის შესახებ კომენტარი გააკეთა ლიტვის საგანგებო და სრულუფლებიანმა ელჩმა საქართველოში.
„ჩვენს დელეგაციაში რამდენიმე მინისტრი, ასევე ბიზნესის წარმომადგენლებიც იმყოფებიან. ვფიქრობ, ძალიან მნიშვნელოვანია ბიზნეს-კავშირების გამყარება, განსაკუთრებით მაშინ, როდესაც ქვეყანა თავისუფალი ვაჭრობის შეთანხმებას ახორციელებს,“ – განაცხადა ელჩმა, იონას პასლაუსკასმა.
შეხვედრებზე ორ ქვეყანას შორის სავაჭრო-ეკონომიკური კავშირების განხილვა იგეგმება. ხვალ კი ლიტვის ოფიციალური დელეგაცია, რომელშიც ბიზნეს-წრეების წარმომადგენლებიც იმყოფებიან, საქართველო-ლიტვის ერთობლივ ბიზნეს-ფორუმში მიიღებს მონაწილეობას.
პრემიერთან შეხვედრის შემდეგ, ლიტვის მთავრობის მეთაური, ალგირდას ბურკევიჩუსი, იუსტიციის სახლს ესტუმრება. მომდევნო შეხვედრა კი საქართველოს პრეზიდენტთან გაიმართება.