რეგიონული განვითარებისა და ინფრასტრუქტურის სამინისტრო ადასტურებს, რომ შპს “საქართველოს გაერთიანებული წყალმომარაგების კომპანიის” 2014 წლის ფინანსური და ბუღალტრული ანგარიშების ირგვლივ გამოძიება მიმდინარეობს.
ამასთან, უწყებაში არ აკონკრეტებენ, დააკავეს თუ არა, წყალმომარაგების კომპანიის ყოფილი მთავარი ბუღალტერი თამარ ფხოველიშვილი.
როგორც სამინისტროს მიერ გავრცელებულ განცხადებაშია აღნიშნული, ფინანსური და ბუღალტრული ანალიზისას, დაფიქსირდა გარკვეული შეუსაბამობები, რის თაობაზეც კომპანიის ხელმძღვანელობამ საქმის კურსში ჩააყენა საქართველოს რეგიონული განვითარებისა და ინფრასტრუქტურის სამინისტრო.
“სამინისტრომ, საკუთარი კომპეტენციის ფარგლებში, შეისწავლა საქმე და, შემდგომი რეაგირებისთვის, საქართველოს შინაგან საქმეთა სამინისტროს ანტიკორუფციულ დეპარტამენტს გადაუგზავნა. ამ დროისთვის მიმდინარეობს გამოძიება და მის დასრულებამდე ამ თემასთან დაკავშირებით, რაიმე ტიპის განცხადების გაკეთება მხოლოდ გამოძიების პროცესზე ზეწოლად შეიძლება ჩაითვალოს”, – აცხადებენ სამინისტროში.
“ნაციონალური მოძრაობის” ინფორმაციით, რამდენიმე დღის წინ სახელმწიფო სახსრების დიდი ოდენობით – ორ მილიონზე მეტი ლარის გაფლანგვის ბრალდებით, დააკავეს შპს “საქართველოს გაერთიანებული წყალმომარაგების კომპანიის” ყოფილი მთავარი ბუღალტერი, ამჟამად სატყეო დეპარტმენტის თავჯდომარის მოადგილე თამარ ფხოველიშვილი.
შინაგან საქმეთა სამინისტრო, პროკურატურა და ფინანსთა სამინისტროს საგამოძიებო სამსახური თამარ ფხოველიშვილის დაკავების შესახებ გავრცელებულ ინფორმაციას არ ადასტურებენ.
