ინდოეთიდან საქართველოში უახლოეს პერიოდში წმინდა ქეთევან დედოფლის წმინდა ნაწილებს გადმოასვენებენ. როგორც “ინტერპრესნიუსს” სოფელ მუხრანში წმინდა ქეთევან დედოფლის სახელობის საკათედრო ტაძრის მშენებლობის იდეის ავტორმა და მშენებლობის თანამონაწილემ ალექსანდრე ბიჭიაშვილმა განუცხადა, მუხრანში შენდება წმინდა ქეთევან დედოფლის სახელობის საკათედრო ტაძარი, მონასტრისთვის კელიები და სატრაპეზო. ასევე, წილკნისა და დუშეთის მთავარეპისკოპოსის რეზიდენციაც.
მისივე თქმით, ტაძრის მშენებლობა უკვე დაწყებულია, ეწყობა სარდაფი, რომელშიც საძვალე მოეწყობა და წმინდა დედოფლის ნეშტს დააბრძანებენ.
“ტაძარი სოფელ მუხრანში პოლიკლინიკის მიმდებარე ტერიტორიაზეა, სადაც ადრე ნატაძრალი არსებობდა”, _ აღნიშნა ბიჭიაშვილმა.
მისივე თქმით, დედოფლის წმინდა ნაწილებს ინდოეთიდან, სავარაუდოდ, მალე გადმოაბრძანებენ. ამასთან დაკავშირებით შეთანხმება მიღწეულია.
“როგორც ვიცი, წმინდა ნაწილების გადმოსვენება მალე მოხდება. კონკრეტულად ჯერ დრო ცნობილი არ არის. წმინდა ნაწილების გამოსასყიდად თანხას არ გადავიხდით. ადრე საპატრიარქოსთან დიდ თანხებზე იყო საუბარი. არ ვიცი, ალბათ ქეთევან წამებულის სულმა ილოცა და დაგვეხმარა. უსასყიდლოდ გვაძლევენ”, _ განაცხადა ბიჭიაშვილმა.
წმინდა დედოფალი ქეთევანი აშოთან მუხრან ბატონის ასული იყო. შაჰ-აბასის ბრძანებით, წმინდა დედოფალი 1624 წლის 26 სექტემბერს აწამეს. გახურებული რვალის ქვაბი დაამხეს თავზე, მარწუხებით მკერდი დააგლიჯეს, გავარვარებული შამფურები გაუყარეს მკერდიდან ზურგში, ფრჩხილები დააძრეს, ხორცი დააგლიჯეს, ლურსმნიან ფიცარზე დააგდეს და ზედაც ლურსმნიანი ფიცარი დააჭედეს, ბოლოს გახურებული ბარით შუბლი გაუპეს. წმინდანის სხეული ჯალათებმა ნადირთა სათრევად დააგდეს, მაგრამ მის წმინდა ნეშტს ნათელი დაადგა.
წამების მხილველმა კათოლიკური ორდენის წარმომადგენლებმა, ავგუსტინელებმა წმიდა დედოფლის ნაწილები საკმევლით და მურით გაჟღენთილ ქსოვილში გაახვიეს და დიდი პატივით ინდოეთში, ქალაქ გუაში არსებულ დაგრასას მონასტერში გადაასვენეს. შემდგომ მიწისძვრის შედეგად მონასტერი დაინგრა და წმინდა დედოფლის საფლავი ბოლო დრომდე დაკარგულად ითვლებოდა. იგი ინდოელ არქეოლოგებთან და ექსპედიციის წევრებთან ერთად ავჭალის წმინდა ქეთევან დედოფლის ტაძრის წინამძღვარმა დეკანოზმა გიორგი რაზმაძემ რამდენიმე წლის წინ აღმოაჩინა.
გავრცელებული ინფორმაციით, მოგვიანებით, ინდოეთის არქეოლოგიური ჯგუფი წმინდა ნაწილების გადმოსაცემად დიდი ოდენობით თანხას ითხოვდა. ინდოეთის მხარემ უცხოეთში წმინდა ნაწილებს დნმ-ს ანალიზი რამდენჯერმე ჩაუტარა. დასტურდება, რომ იგი წმინდა დედოფალს ეკუთვნის.
