გახმაურებულ მკვლელობებთან დაკავშირებით დროებითი საპარლამენტო კომისიის შექმნის საკითხის განხილვას დეპუტატებს, ნუკრი ქანთარიას და ირმა ნადირაშვილს შორის მწვავე პოლემიკა მოჰყვა .
ქანთარიამ უმცირესობის წევრებს გარდაცვლილებით მანიპულირებისგან თავის შეკავებისკენ მოუწოდა და მიმართა, “თავი დაანებონ მკვდარი ადამიანების ტრიალს”.
ქანთარიას გამოსვლას უმცირესობიდან ირმა ნადირაშვილი გამოეხმაურა. “დღემდე გარდაცვლილი ადამიანებით ინარჩუნებთ თანამდებობებს. თუ ვინმე მიცვალებულებს ატრიალებს, ეს თქვენ ხართ და თქვენი ჭორიკანა პროკურორი არჩილ კბილაშვილი, რომელმაც თავის დროზე განაცხადა, რომ არა ეს მიცვალებულები, ხელისუფლებაში ვერ მოვიდოდითო. მარტო კი არ მოხვედით ამ მიცვალებულებით, არამედ ამ მიცვალებულებით ხელისუფლებას ინარჩუნებთ. ქვეყნის მართვაში უუნაროები ხართ და როცა კრიზის გაქვთ, მიცვალებულების ტრიალს იწყებთ. მეც შემიძლია შეგახსენოთ, როგორ დარბოდით თბილისის ომის დროს, როდესაც საკუთარი მეგობარი დაჭერით. ძალიან უხერხულია როცა იური ვაზაგაშვილის მკვლელობაზე ხელს აქეთ იშვერთ”, – მიმართა ქანთარიას ირმა ნადირაშვილმა.
პარლამენტმა “იური და ზურა ვაზაგაშვილების, ბარბარე რაფალიანცის, შალვა თათუხაშვილის, ეროსი კიწმარიშვილისა და აჩიკო მაისურაძის შეკვეთილი მკვლელობების ფაქტების შემსწავლელი დროებითი საგამოძიებო კომისიის შექმნის მიზანშეწონილობის თაობაზე” დადგენილების პროექტი განიხილა. კომისიის შექმნის წინადადებით პარლამენტს “ნაციონალურმა მოძრაობამ” მიმართა.
როგორც უმცირესობა განმარტავს, მკვლელობის საქმეები, რომელზეც არსებობს ეჭვი, რომ შეკვეთილია, დღემდე გამოუძიებელია. ამიტომაც მათი აზრით, მიზანშეწონილია პროცესში საქართველოს პარლამენტი ჩაერთოს და არსებულ კითხვებზე პასუხის გაცემაზე მან აიღოს პასუხისმგებლობა.
საკითხს მხარს არ უჭერს უმრავლესობა. მმართველი გუნდის წარმომადგენელთა განცხადებით, საქმეებს საგამოძოებო ორგანოები გამოიძიებენ.
