ის ადამიანები, რომლებიც იანუკოვიჩის მთავრობის წევრები არიან და მათ წინააღმდეგ უკრაინის პროკურატურა სამართლებრივ დევნას დაიწყებს, საქართველოში არასოდეს არ დაინიშნებიან მაღალი რანგის თანამდებობებზე, – ეს კომენტარი საქართველოს იუსტიციის მინისტრმა, თეა წულუკიანმა უკრაინაში ვიზიტის დროს გამოცემა “უკრინფორმთან” ინტერვიუს დროს გააკეთა. მისივე თქმით, უკრაინისა და საქართველოს მთავრობებს და ხალხს შორის კავშირები ყველაფერზე მაღლა დგას და იგი არ მისცემს არავის უფლებას ეს კავშირები დააზიანოს.
ჟურნალისტის კომენტარზე, რომ სააკაშვილის მთავრობისგან მოქმედ ხელისუფლებას ყველაზე ცუდ მდგომარეობაში მყოფი ქვეყანა არ ჩაუბარებია, უკრაინამ კი იანუკოვიჩისგან განადგურებული ქვეყანა მიიღო, თეა წულუკიანმა აღნიშნა: “ეს არ ნიშნავს იმას, რომ წინა მთავრობის დროს არ ყოფილა კანონის დარღვევა, მაგალითად, ჩვენ მივიღეთ საკმაოდ კარგი გამჭვირვალე იუსტიციის სახლი, რაც მილიონები დაჯდა, თუმცა იცით, რომ ეს მილიონები ჩემმა წინამორბედებმა ბიზნესმენებს ტერორისა და ციხის დახმარებით წაართვეს?”.
მისივე თქმით, თუ უკრაინამ იანუკოვიჩისგან განადგურებული ეკონომიკის მქონე ქვეყანა მიიღო, საქართველოს მოქმედმა მთავრობამ განადგურებული ქვეყანა ჩაიბარა ადამიანის უფლებების კუთხით.
კითხვაზე, არის თუ არა დანაშაული ქვეყნის ინტერესებიდან გამომდინარე, რომ ის ოლიგარქები, რომლებსაც ბევრი აქვთ მოპარული, მთავრობაში მოდიან, იუსტიციის მინისტრმა განაცხადა, რომ საქართველოში არ არის ბევრი ოლიგარქი.
“ჩვენ არ გვყავს ბევრი ოლიგარქი, საერთოდ არ გვყავს, ჩვენ გვყავს ბიზნესმენები, რომლებსაც საქმე კარგად მისდით, ისინი არ იპარავენ, ისინი იხდიან გადასახადებს და მუშაობენ, ისინი არ არიან ტერორის ქვეშ. წინა მთავრობა იყო სპეცეფექტების და ფასადების მთავრობა. მაგალითად, განსაკუთრებული ეფექტი ჰქოდა ე.წ სატელევიზიო დაკავებებს. მიდიხარ კამერებით და აკავებ, შემდეგ ამბობ, რომ ეს არის კორუფციის წინააღმდეგ ბრძოლის რეფორმა. მუშაობა ევროპული სტანდარტების და კანონის შესაბამისად არის უდიდესი საქმე. სააკაშვილს ამის მოთმინება არ ჰქონდა, ის ჰიპერაქტიული ადამიანია, მას არ შეუძლია მოითმინოს და მიჰყვეს ხანგრძლივ პროცესებს. ევროპული სტანდარტები საკმაოდ რაფინირებული სამუშაოა. ადამიანის უფლებების დაცვა არ არის მარტივი”, – აღნიშნა თეა წულუკიანმა “უკრინფორმთან” ინტერვიუში.
