დახმარება, რომელიც საბანკო სექტორმა შეიძლება სტიქიის შედეგად დაზარალებულებს და ქალაქს გაუწიოს, დიდი და მასშტაბური იქნება, – ამის შესახებ მთავრობის კანცელარიაში გამართული შეხვედრის დასრულების შემდეგ ჟურნალისტებს საბანკო ასოციაციის თავმჯდომარემ ზურაბ გვასალიამ განუცხადა.
“საბანკო სექტორი დაზარალებულთა სოლიდარობის საქმეში ერთიანია. 80-85 პროცენტი მსესხებლებისა, რომლებიც დაზარალდნენ, დადგენილია. ყველა შეღავათი, ყველა ფორმა, დაწყებული ჩამოწერით – საბანკო სექტორის მხრიდან გამოყენებული იქნება. გარდა ამისა, საბანკო სექტორი მზადყოფნას გამოთქვამს, დაეხმაროს როგორც სტიქიის შედეგად დაზარალებულ მოქალაქეებს, ასევე ქალაქს და ქვეყანას”, – განუცხადა ჟურნალისტებს გვასალიამ.
მისივე თქმით, წინასწარი გათვლებით დაზარალებულ მოქალაქეთა დაახლოებით 80 პროცენტის ვალი 282 ათასია, რაც გვასალიას შეფასებით, შესაძლოა 300 ათასამდე გაიზარდოს.
