…უხერხულობას იმის გამო კი არ გრძნობს, რომ გათხოვდა, თანაც – ოპოზიციონერზე, არამედ, ის ეუხერხულება, რომ გადაცემა დაუხურეს, ჯამაგირს კი, უწინდებურად იღებს… ისე, იმედოვნებს, რომ ახალი სეზონიდან «საზოგადოებრივი მაუწყებლის» ეთერში ისევ გამოჩნდება და ისევ პოლიტიკურ თოქ-შოუს «გააკეთებს», თუმცა იმასაც აღიარებს, რომ პოლიტიკოსებთან საუბარი მობეზრდა და აღარ აინტერესებს… «პოლიტიკური გადაცემის მომზადება პოლიტიკოსების გარეშეც შეიძლება და ამ კუთხით საინტერესო იდეა მაქვს. საერთოდ, ვთვლი, რომ პოლიტიკურმა ჟურნალისტიკამ სხვა მიმართულებით უნდა გადაინაცვლოს», – ამბობს ტელეჟურნალისტი, საზოგადოებრივი მაუწყებლის» აწ უკვე ყოფილი პოლიტიკური თოქ-შოუ «პირველი სტუდიის» ექსწამყვანი და ავტორი ეკა მიშველაძე, რომელსაც გათხოვება «კარიერულ კრახად» დაუჯდა… ერთი სიტყვით, სთავაზობენ თუ არა სხვა ტელევიზიები თანამშრომლობას, რა შეკითხვას არიდებს თავს და გახდება თუ არა «თავისუფალი დემოკრატების» გენერალური მდივნის, ალექსი პეტრიაშვილის თანამეცხედრე პოლიტიკური სახე? – «ქართული სიტყვა» ეკა მიშველაძეს ესაუბრა.
– ეკა, მეგონა, «საზოგადოებრივზე» აღარ იყავი და გამიკვირდა, შეხვედრა ტელევიზიაში რომ დამითქვი…
– ამის გამო თავს, მართლაც, უხერხულად ვგრძნობ, თორემ სხვა რამეზე, რაც მრჩეველს ეუხერხულა, უხერხულობას არ განვიცდი. უბრალოდ, გადაცემა აღარ მაქვს, თორემ «საზოგადოებრივი მაუწყებლის» თანამშრომელი ვარ და ხელფასსაც ჩვეულებრივ ვიღებ. ისე, ჩემი და მენეჯმენტის შეხვედრა ვერა და ვერ შედგა – ამ შეხვედრის ორგანიზება, ალბათ, ძალიან რთულია…
– გადაცემა აღარ გაქვს და ხელფასს მაინც იღებ? – ეს რას ნიშავს?
– გენერალურმა დირექტორმა ერთ-ერთ არხზე, სატელეფონო ჩართვისას განაცხადა, რომ ჩემთან შემოთავაზება აქვთ, თუმცა ჩემთვის ჯერ არაფერი შემოუთავაზებიათ და მოთმინებით ველოდები, რას შემომთავაზებენ.
– ანუ, სამსახურში რომ არ იარო, არავინ დაგსჯის და ხელფასს მაინც მოგცემენ?
– სამსახურში მაინც დავდივარ, იმედს არ ვკარგავ, თუმცა აგვისტოში, ჯერ საინფორმაციო სააგენტოებით გავიგე, ორი თვის შემდეგ კი, საზოგადოებისთვის აბსოლუტურად უცნობი ადამიანისგან, რომელიც «საზოგადოებრივ მაუწყებელზე» მიმდინარე და ახალი ამბების დირექტორი გახდა…
– ამ ადამიანზე ამბობენ, რომ რუსეთუმეა და ადრე «ევრაზიულ კავშირთან» მეგობრობდა…
– არ ვიცი… ეს ადამიანი აქ გავიცანი… პირადად მე, «ევრაზისტებთან» შეხვედრაზე არ წავიდოდი, მაგრამ თუ ექსპერტია და ეს საკითხი მისი კვლევის საგანი იყო, კი ბატონო… მოკლედ, ამ ადამიანისგან სხვა მედიასივრციდან მოვისმინე, რომ ახალი სეზონიდან ჩემი გადაცემა, თურმე, ეთერში აღარ იქნება, თუმცა არ ვიცი, ეს გადაცემა ცუდი რატომ იყო, ან რა დავაშავე…
– ცოლად ოპოზიციონერს გაჰყევი, რითიც უხერხულობა შექმენი და ამაზე მეტი რაღა უნდა დაგეშავებინა?
– ვანო, მე და შენ დიდი ხანია, მედიაში ვართ და ვიცით, რომ არ შეიძლება, გათხოვება არგუმენტი იყოს. ეს სასაცილოა, სატირალი რომ არ იყოს და, უბრალოდ, სირცხვილია! თუკი არგუმენტი ესაა, მაშინ ხმამაღლა ვამბობ: გადაცემა პოლიტიკური ნიშნით დამიხურეს, ოღონდ ჩემი პოლიტიკური ორიენტაციისა და სიმპათიის შესახებ დედამიწის ზურგზე ერთმა ადამიანმაც არ იცის, რადგან ჩემს პროფესიას უდიდეს პატივს ვცემ და ამდენი წლის განმავლობაში ამ საქმეს ისე ვემსახურე, არავის უთქვამს, ეკა ან იმისიანია, ან ამისიანიო. ის, რომ ცოლად «თავისუფალი დემოკრატების» გენერალურ მდივანს გავყევი, იმას ნიშნავს, რომ ამ პარტიის ხაზი უნდა გავატარო? მე და ბუკა პეტრიაშვილს ურთიერთობა გუშინ არ დაგვიწყვია, მაგრამ ერთი შენიშვნაც არ მიმიღია, რომ მიკერძოებული ვარ და ვინმეს მხარს ვუჭერ. პროფესიონალებისთვის სიყვარული, ოჯახი და საქმე აბსოლუტურად გამიჯნულია, თორემ ვაი-ჟურნალისტებისა და ვიღაცებისთვის, ან მათთვის, ვინც ეს თქვა, როგორც ჩანს, გამიჯნული არაა.
– სხვათა შორის, მათი ოჯახის წევრები, ვისთვისაც გარკვეული უხერხულობა შექმენი, როგორც ვიცი, კანცელარიაში მუშაობენ…
– დიახ, ამის უამრავი მაგალითია: «საზოგადოებრივ მაუწყებელზე» მუშაობენ ადამიანები, რომელთა ოჯახის წევრებიც «ქართული ოცნების» ღია მხარდამჭერები არიან. ზოგის ქმარი ივანიშვილის ნათესავია, ზოგის ოჯახის წევრი კი, – საკრებულოში «ქართული ოცნების» წარმომადგენელი და, როგორც ვიცი, პოლიტიკური თოქ-შოუები მათ უნდა წაიყვანონ, მაგრამ ეს უხერხულობას არ ქმნის.
– ეკა, შეგიძლია, «საზოგადოებრივ მაუწყებელს» უჩივლო?
– ჩემი ხელშეკრულება ძალაშია და რაზე უნდა ვუჩივლო?
– ანუ, სამსახურიდან კი არ გაგათავისუფლეს, უბრალოდ, გადაცემა დაგიხურეს და, შესაბამისად, ტელევიზიის ხელმძღვანელობას პასუხს ვერ მოსთხოვ, არა?
– ამიტომ, შემოთავაზებას ველოდები. პოლიტიკური ჟურნალისტი ვარ და ერთადერთი, რაც უნდა გავაკეთო, პოლიტიკური გადაცემაა. თუ შემოთავაზება იქნება, რომ იგივე პროფილის, თუმცა სხვა ფორმატის გადაცემა გავაკეთო, ამაში პრობლემას ვერ ვხედავ – როცა სეზონს ვამთავრებდით, მხოლოდ ჩემს პროდიუსერებს კი არა, ბორდი-ს თავმჯდომარესა და გენერალურ დირექტორსაც ვუთხარი, გადაცემის ფორმატი მოძველდა და რაღაცები უნდა შევცვალო-მეთქი. კონკრეტული იდეები ახლაც მაქვს, მაგრამ მთავარია, ვინმემ მომისმინოს.
– რატომ არ გხვდებიან და არ გისმენენ?
– არ სცალიათ! ცოდვას ვერ ვიტყვი, გენდირექტორს ახლახანს შევხვდი, მეგონა, რომ ჩემს თემაზე ვისაუბრებდით, მაგრამ ჩემი გადაცემის გარდა ყველაფერზე ვილაპარაკეთ და როცა ვიკითხე, აბა, რას ვშვრებით-მეთქი, მომიგო, ახლა მეჩქარება და ამ დღეებში შევხვდეთო, მაგრამ ამასობაში, ათი დღე გავიდა.
– როგორი შთაბეჭდილება შეგექმნა – «საზოგადოებრივის» გენდირექტორი შენთან დაკავშირებით პასუხს ვინმესგან ხომ არ ელოდება თუ ტელევიზიიდან საერთოდ ვერ გიშვებენ, რადგან ამას უფრო დიდი ხმაური მოჰყვება?
– შეგვიძლია, ორივე ვერსია განვიხილოთ… თუკი უხერხულობას, მართლაც, ის უქმნით, რომ ცოლად ოპოზიციონერს გავყევი, მითქვამს და ახლაც ვიტყვი: «საზოგადოებრივი მაუწყებელი» ყველას ტელევიზიაა, მათ შორის, ხელისუფლების და ოპოზიციისაც. ამიტომ, ასე დაყოფა არ შეიძლება… როგორც გავიგე, პოლიტიკურ თოქ-შოუებს ამატებენ და იმ ადამიანთა ბეგრაუნდი, ვინც ეს გადაცემები უნდა წაიყვანონ, «ქართულ ოცნებასთან» მჭიდრო კავშირშია, მაგრამ ეს, როგორც ჩანს, უხერხულობას არ ქმნის. ამიტომ ვამბობ, რომ ჩემთან დაკავშირებით პოლიტიკური გადაწყვეტილებაა და არავინ თქვას, რომ ამ ქვეყანაში ჟურნალისტები პოლიტიკური ნიშნით არ იდევნებიან!
– ეკა, როცა შენ და ალექსი პეტრიაშვილმა გადაწყვიტეთ, რომ თქვენი ურთიერთობა გაგესაჯაროვებინათ, ერთი წამითაც არ დაგიშვია, რომ ამის გამო სამსახურში პრობლემები შეგექმნებოდა?
– ვანო, აბსოლუტურად გულწრფელად გეტყვი: ამაზე ერთი წამითაც არ მიფიქრია, რადგან ოდესმე ეჭვიც კი არ არსებობდა, მიშველაძე ვინმესიანიაო. შესაბამისად, ვერც ვიფიქრებდი, რომ ვინმეს ჩაეთვალა, რაკი ჩემი ქმარი «თავისუფალი დემოკრატების» წევრია, ეს გადაცემაზე რამე გავლენას მოახდენდა. ზოგადად, ძალიან კრიტიკული ადამიანი ვარ და ვთვლი, რომ მაგ გუნდს პოტენციალი აქვს, თუმცა სამუშაოც ბევრია.
– …გათხოვების მერე გაიგე, რომ გითვალთვალებდნენ?
– ამ თემაზე ლაპარაკი არ მინდა.
– რატომ?
– იმიტომ, რომ ეს მხოლოდ მე და ბუკას არ გვეხება. შესაბამისად, ამ ეტაპზე ამ შეკითხვას თავს ავარიდებ.
– კეთილი… ეკა, დიდი ხანია, მედიაში ხარ. «მხედრიონის» პერიოდიც გამოიარე. ზეწოლა სხვა დროს არ ყოფილა?
– არც ერთ ეტაპზე… «ნაციონალების» მმართველობის დროს, «ბი-ბი-სი»-ს პროექტს ვაკეთებდი, ჩარევა არასოდეს ყოფილა, ეთერში ეს და ეს არ მოიყვანო, ან რომელიმე შეკითხვა არ დასვაო. რაც პოლიტიკური თოქ-შოუ მქონდა, ეთერში ყველა პარტიის წარმომადგენელი მომყავდა და შენიშვნაც არასოდეს მიმიღია. სამაგიეროდ, მაღალი სტანდარტების უცხოელი მედიაექსპერტებისგან «საზოგადოებრივ მაუწყებელზე» არაერთი სამადლობელი წერილი მოსულა, რა კარგია, რომ ასეთი დაბალანსებული და გაწონასწორებული გადაცემა არსებობსო. სხვათა შორის, «საზოგადოებრივმა მაუწყებელმა» ამ კუთხით საუკეთესო მაჩვენებელი სწორედ ამიტომ «დადო», რადგან აქ ყველა პოლიტიკური პარტია ყველაზე მეტად იყო წარმოჩენილი.
– დასავლურმა მედიაექსპერტებმა შენი გადაცემის დახურვის შესახებ შეიტყვეს და რა რეაქცია ჰქონდათ?
– ყველას მივწერე, თუმცა მათ შეფასებებს მას შემდეგ გავასაჯაროებ, თუ როგორ დამთავრდება ეს ძალიან უხერხული და უცნაური სიტუცია.
– გგონია, რომ ოდესმე დამთავრდება?
– აუცილებლად, რადგან «საზოგადოებრივ მაუწყებელზე» ახალი სეზონი, ადრე თუ გვიან, აუცილებლად დაიწყება.
– ახალი სეზონის დაწყებასაც ასაიდუმლოებენ?
– ვიცოდი, რომ ოქტომბრის ბოლოს უნდა დაწყებულიყო, მაგრამ მგონი, ცოტა გადაიწია. ვანო, პირველად ვამბობ: ამ წერილებში «საზოგადოებრივი მაუწყებლისა» და, სამწუხაროდ, არც ხელისუფლებისთვის სასიკეთო არაფერი წერია, რადგან ყველა დასავლელი მედიაექსპერტი და ინსტიტუცია გადაცემის დახურვას პოლიტიკური ნიშნით დევნად აფასებს, ოღონდ ვერ ვხვდები, რად უნდა ვინმეს დამატებითი პრობლემატური თემები.
– გაუგებარი რა არის? – ერთ-ერთი მრისხანე ოპოზიციონერის ცოლი ხარ!
– ცოლი სახლში ვარ, სამსახურში კი არა, თან ანგაჟირებული და მიკერძოებული აქამდე არასოდეს ვყოფილვარ!
– აქამდე არც პოლიტიკოსი თანამეცხედრე გყოლია!
– არა, მაგრამ პოლიტიკოსი შეყვარებული მყავდა, მაგრამ ამას ვერავინ ხვდებოდა.
– ეკა, იზიარებ მოსაზრებას, რომ «ოცნებამ» «ნაცების» ყველაფერი ცუდი დააკოპირა? ზოგი ამბობს, რომ ეს პორტირებული «ნაციონალების» ბრალია, ზოგი კი თვლის, რომ «უფროსობა» კომფორტულია…
– ჯერ კიდევ არჩევნებამდე განაცხადეს, რომ მედია თავისუფალი იქნებოდა და «ოცნების» ხელისუფლებაში მოსვლის შემდეგ, გარკვეული პერიოდი, მედია, მართლაც, თავისუფალი იყო, თუმცა ხელისუფლებამ ეს თავისუფლება ვერ შეირგო! არადა, მედიის თავისუფლება ყველა ხელისუფლების პლუსია, რადგან ეს მის დემოკრატიულობაზე მიუთითებს. ხელისუფლებისთვის მიუღებელი აღმოჩნდა ისეთი შეკითხვების დასმა, რომელიც არ მოსწონს. ამიტომ, მედიასაშუალებებში გარკვეული ფილტრაცია დაიწყო. სხვათა შორის, ჩემთვისაც, ინგა გრიგოლიასთვისაც, ნინო ჟიჟილაშვილისა და ვახო სანაიასთვისაც ძალიან დიდი ხნის წინ იყო ცნობილი, რომ ამ ხელისუფლებაში არის ადამიანი, რომელსაც ამ სახეების ეთერში ნახვა არ უნდოდა.
– არ ვიცი, რომელ ადამიანზე ლაპარაკობ…
– ყოფილ პრემიერზე და ამის შესახებ მეგობრები გვაფრთხილებდნენ…
– მე კი, კულუარებიდან სხვა ინფორმაცია მაქვს. ასე, მაგალითად, ამბობენ, რომ ინგა გრიგოლიას გადაცემის დახურვაში გადამწყვეტი სიტყვა გუგული მაღრაძეს ეკუთვნოდა… კულისებში იმისთვისაც ხომ არ მოგიკრავს ყური, თუ ვინაა ხელისუფლების არაოფიციალური მედიამრჩეველი?
– ვიცი, «საზოგადოებრივ მაუწყებელში» ვინცაა მრჩეველი.
– ვინ?
– ბასა ჯანიკაშვილი მრჩეველია… რაღაც «ლინკებიც» არსებობს, მათ შორის. ძალიან უხერხულია, თუ ურჩევს, რომ ასეთი ნაბიჯები გადადგას, ესე იგი, ძალიან სუსტი მედიამრჩეველია, რადგან ეს არც მე მაზიანებს, არც – ინგა გრიგოლიას და არც – «რუსთავი 2»-ს. პირიქით, ყველაფერი ეს, პირველ რიგში, ხელისუფლებას და ამ ქვეყნის დემოკრატიულ განვითარებას აზიანებს.
– ოპოზიცია აცხადებს, რომ ხელისუფლება ელექტრონულ მედიასთან დაკავშირებით ე.წ. «ენ-ტე-ვე»-ს სცენარით მოქმედებს…
– ვანო, ძალიან ბევრი მსგავსებაა, თუმცა ძალიან არ მინდა, ასე იყოს და ჯერ კიდევ მაქვს იმედი, ადამიანებს ეყოფათ გონიერება, რომ თავი ისეთ სამარცხვინო მდგომარეობაში არ ჩაიგდონ, როგორ მდგომარეობაშიც რუსეთმა ჩაიგდო.
სხვათა შორის, ეკა მიშველაძის გადაცემა იმითაც იყო გამორჩეული, რომ ევროატლანტიკური კურსის «პრომოუტირება» ცალსახად მიდიოდა, რადგან ეს ჩემი კრედო და პოზიციაა. ვთვლი, რომ ეს ქვეყნის მთავარი ხაზიც უნდა იყოს და არის. ყოველ შემთხვევაში, გაცხადებულად ასეა, მაგრამ მეორე საკითხია, პარალელურად რა ხდება, მაგალითად, «გაზპრომთან» ბურუსით მოცული მოლაპარაკება, რასაც დანაშაულად და ქვეყნის ღალატად ვთვლი, რადგან «გაზპრომი», ჯერ ერთი, იგივე პუტინი და კრემლია, მეორეც, მასთან ურთიერთობის ძალიან ცუდი გამოცდილება გვაქვს და კარგად გვახსოვს, რა უბედურებაც გადავიტანეთ… მოკლედ, «გაზპრომთან» მოლაპარაკება უნდა ჩაიშალოს, რადგან ერთი არგუმენტიც კი ვერ მოვისმინე, თუ რატომ «გაზპრომი», ან საერთოდ, ვერ ვიგებ, ოკუპანტთან მოლაპარაკება რატომ უნდა აწარმოო?
– ხელისუფლებამ გვითხრა, რომ ყველაფერი ეს ცრუ აჟიოტაჟია და საგანგაშო არაფერია…
– კი ბატონო, მაგრამ ვინმემ გვითხრა «გაზპრომთან» მოლაპარაკებას ამ და ამ საკითხზე ვმართავთო?
– ეკა, ახლა მივხვდი, ეთერიდან რატომაც მოგხსნეს – «გაზპრომსა» და მსგავს საკითხებზე არასაჭირო კითხვები რომ არ დაგესვა!
– ვთვლიდი, რომ ამ ქვეყნისთვის კარგ საქმეს ვაკეთებდი. მაგალითად, ჩემს ეთერში ვერასოდეს ნახავდით «ევრაზიული კავშირის» წევრებს, რადგან ჩემი აზრით, ისინი არ უნდა გააპიარო.
– ვინმეს «ლაითადაც» არ მიუნიშნებია, «ევრაზისტები» დაპატიჟეო?
– არა! არასოდეს არავინ ჩარეულა და ისიც კი არ მოუკითხავთ, ეკა, რა თემას აკეთებო. ამ მხრივ სრული თავისუფლება მქონდა, თუმცა ეს ვიღაცისთვის, როგორც ჩანს, მიუღებელი გახდა.
– «პირველ სტუდიაში» სტუმრად ყოფილი ან მოქმედი პრემიერი გყოლია?
– სამწუხაროდ, – არა. ჩემს ეთერში ძალიან ხშირად იყო პრეზიდენტი, პარლამენტის თავმჯდომარე, მინისტრები. ჩემს ეთერში ორადორი ადამიანი არ ყოფილა – ბიძინა ივანიშვილი და ირაკლი ღარიბაშვილი.
– გადაცემაში მონაწილეობა შეგითავაზებია?
– რა თქმა უნდა… ბიძინა ივანიშვილისგან, პირადად, სამჯერ დაპირებაც მივიღე, მაგრამ არ შეასრულა. ირაკლი ღარიბაშვილთანაც ბევრი მცდელობა მქონდა, მაგრამ გადაცემამდე ორი დღით აღმოჩნდებოდა ხოლმე, რომ გადაცემაში ვერ მოვიდოდა. არადა, ეს პოლიტიკოსებისთვის არაკომფორტული ეთერი არ იყო იმიტომ, რომ მწვავე შეკითხვებს კი ვსვამდი, მაგრამ ადამიანს პასუხის გაცემის საშუალებას ვაძლევდი. იმედი მაქვს, სამომავლოდ ორივე მოვა!
– მაშასადამე, მომავალს ოპტიმისტურად უყურებ და გჯერა, რომ «საზოგადოებრივზე» პოლიტიკური თოქ-შოუ ისევ გექნება?
– კი, ამის იმედი მაქვს… ახლა ყველაზე გონივრული ნაბიჯი იქნება, რომ ეკა მიშველაძეს პოლიტიკური თოქ-შოუ ჰქონდეს. ვიმედოვნებ, ერთი გონიერი ადამიანი მაინც, ერთი გონიერი მრჩეველი მაინც მოიძებნება, რომელიც ამას ხვდება და იქ იტყვის, სადაც საჭიროა!
– …ისე, როგორ ფიქრობ, ქმარი ოჯახის წევრია?
– (იცინის) ზოგიერთისგან გასხვავებით, ვთვლი, რომ ოჯახის წევრია და ქმრის ნათესავებსაც ჩემს ნათესავებად ვთვლი! დედაც ოჯახის წევრია…
– ეკა, ყველა ხელისუფლება ყველაფერ ცუდს, რაც ქვეყანაში ხდება, ჟურნალისტებს რატომ გვაბრალებს?
– იმიტომ, რომ არც ერთი ხელისუფლება საკუთარ ძალებში დარწმუნებული არაა და ვერც რეალური დემოკრატიული პროცესები წარმართა! საერთოდ, ძალიან ადვილია, შენი შეცდომები სხვას გადააბრალო და განტევების ვაცი ვინ უნდა იყოს, თუ არა მედია, რომელიც ყველას დისკომფორტს უქმნის. ჩემთვის მოსაწონი ის ხელისუფლება იქნება და არჩევნებზეც ხმას იმ პოლიტიკურ ძალას მივცემ, რომელიც დამარწმუნებს, რომ საკუთარ შეცდომასა და წარუმატებლობას სხვას, პირველ რიგში, მედიას არ დააბრალებს. მედია ხელისუფლების «დამხმარეა», მაგრამ «დამხმარე» იმ კუთხით კი არა, რომ აქოს და ადიდოს. ხელისუფლება იმის გამო არ უნდა ერჩოდეს, რომ მედია მის საქმიანობაში რაღაც შეცდომებს პოულობს.
– ყველაფერი გასაგებია, მაგრამ მედალს ორი მხარე აქვს. შესაბამისად, არ შეიძლება, მედიასთან ურთიერთობაში დამნაშავე მხოლოდ ხელისუფლება იყოს. ეგებ, ჩვენ, ჟურნალისტებიც ვცოდავთ?
– ჩვენი მედია ძალიან გადაყვითლებულია და სულაც არ მომწონს, როცა საზოგადოებას მდარე ხარისხის პროდუქციას სთავაზობს. გარდა იმისა, რომ საზოგადოებას ინფორმაცია უნდა მიაწოდოს, მედიის ერთ-ერთი ფუნქცია შემეცნება და განათლებაცაა, მაგრამ დღეს ჩვენი მედია ამას არ აკეთებს. მედიამ საკუთარი სტანდარტი უნდა ასწიოს – საზოგადოებას მაღალი ხარისხის პროდუქცია შესთავაზოს და, შესაბამისად, საზოგადოების მოთხოვნაც ამაღლდება…
– წეღან თქვი, «ევრაზისტებს» არასოდეს «გავაპიარებო». «ქართული სიტყვის» სარედაქციო პოლიტიკაც ზუსტად ასეთია, თუმცა ყველა ჩვენი კოლეგა ასე არ ფიქრობს. იქნებ, ესეც ჩვენი ნაკლია?
– ამას სხვა ხაზი უნდა ჰქონდეს, ანუ უნდა გამოჩნდეს, რომ ამ ადამიანების პოლიტიკური ორიენტაცია არასწორია. ეს კი ჟურნალისტური ტექნიკის საქმეა. ქვეყნის გაცხადებული საგარეო პოლიტიკიდან გამომდინარე, ამ ხალხის პოპულარიზაცია არ შეიძლება და რაც უფრო ნაკლებ მედიასივრცეს დავუთმობთ, ჩვენთვისაც და, მგონი, მათთვისაც უკეთესი იქნება.
– ეკა მიშველაძეს, როგორც გადაცემის ავტორსა და წამყვანს, პირადი შეხედულების გამო, ვინმე დაუბლოკავს?
– არა… ახლა თავს ყველა ექსპერტად თვლის. მაგალითად, კინორეჟისორი პოლიტიკურ საკითხებში ვიღაცისთვის, შეიძლება, საუკეთესო ექსპერტი იყოს, მაგრამ ასეთ ადამიანებს ეთერში არ ვიწვევ, რადგან ვთვლი, ექსპერტი ისაა, ვისაც კონკრეტულ სფეროში სათანადო განათლება აქვს და პოლიტიკურ გადაცემაში კინორეჟისორის აზრი არ მაინტერესებს.
– ახლა, როგორც იტყვიან, ისრებს გოგა ხაინდრავასკენ ისვრი, არა?
– ისრებს არავისკენ ვისვრი, მაგრამ ძალიან კარგად მიხვდებიან, თუ ჯერ კიდევ შერჩენიათ გონი, რომ აზრი თუნდაც სტრიქონებს შორის წაიკითხონ!
– ხშირად ამბობენ, რომ «ოცნებას» პიარი არ უვარგა და ამას თავად «ოცნებელებიც» აღიარებენ. შენ, როგორც პროფესიონალი, ამას რითი ხსნი?
– იცი, რაშია საქმე? – ტყუილის შეფუთვა ძალიან ძნელია.
– გეთანხმები, მაგრამ ტყუილს, მაგალითად, მიშა იდეალურად ფუთავდა…
– იმის შეფუთვა, რაც არ არსებობს, ძალიან ძნელია. ამიტომ, რომ შეფუთო, რაღაც უნდა გააკეთო. სხვათა შორის, «აბრეშუმის გზის ფორუმი» ძალიან კარგად გაპიარდა.
– სხვათა შორის, ეს ფორუმი პრემიერ ირაკლი ღარიბაშვილის ინიციატივით გაიმართა…
– ჰოდა, გადასარევი, შესანიშნავი ინიციატივაა და ნეტავ, სულ ასეთი რაღაცები ხდებოდეს! რაც შეეხება პიარს, ან ცოტა დაბნეულები არიან, ან პროფესიონალების ნაკლებობაა, ან არ იციან, რა უნდა გააპიარონ. ალბათ, უფრო არ იციან. ასე, მაგალითად: ერთის მხრივ, ამბობენ, რომ ქვეყანაში მედია თავისუფალია და მეორეს მხრივ, ეკა მიშველაძეს გადაცემას პოლიტიკური ნიშნით უხურავენ!
– ეკა, ხელისუფლების ყველაზე დაბალი რანგის ჩინოვნიკსაც კი არ უთქვამს, მიშველაძეს გადაცემა პოლიტიკური ნიშნით დავუხურეთო…
– გადაცემას იმიტომ ვხურავთ, რომ ცოლად ოპოზიციონერს გაჰყევიო და ეს პოლიტიკური ნიშანი არაა?
– შენც მოგეთმინა და მაშინ გათხოვილიყავი, როცა ხელისუფლებაში «თავისუფალი დემოკრატები» მოვიდოდნენ!.. გამოტყდი: 2012 წელს ხმა «ოცნებას» მიეცი?
– ის ხელისუფლება შესაცვლელი იყო, რადგან ძალიან ბევრი ცუდი და უარყოფითი დაგროვდა. ძალიან კარგია, რომ ეს ცვლილება მოხდა, მაგრამ სამწუხაროდ, რაღაცები უარესობისკენ წავიდა!
– …სხვა არხებიდან შემოთავაზება არ გაქვს?
– დიახ, მაქვს, თუმცა არც ერთ შემოთავაზებას ჯერჯერობით არ განვიხილავ. ძალიან მინდა, რომ მუშაობა «საზოგადოებრივ მაუწყებელზე» გავაგრძელო, რადგან ჯერ ერთი, აქაურობა მიყვარს, მეორეც, ეს ყველას ტელევიზიაა… მოკლედ, ძალიან მინდა, თუ საქმიანობას მედიაში გავაგრძელებ, ისევ «საზოგადოებრივ მაუწყებელზე» ვიყო…
– ანუ, არსებობს ალბათობა, რომ მედია დატოვო და, ვთქვათ, პოლიტიკაში წახვიდე?
– ვანო, გამორიცხული არაფერია! მით უმეტეს, რომ ჟურნალისტებმა, განსაკუთრებით, პოლიტიკურ თემებზე მომუშავე ჟურნალისტებმა პოლიტიკა ბევრ პოლიტიკოსზე უკეთ ვიცით!
– ესე იგი, ერთ მშვენიერ დღეს შეიძლება, «თავისუფალი დემოკრატების» სახედ გიხილოთ?
– მსგავსს არაფერს ვფიქრობ ამ ეტაპზე.
– დავიჯერო, ამაზე შინ არ გიმსჯელიათ? ისე, ბუკა ყველაფერ ამაზე რას ამბობს?
– ბუკამ ძალიან კარგად იცის, ეს პროფესია როგორ მიყვარს და იმასაც ხედავს, ყველაფერს როგორ განვიცდი. ძალიან წუხს… უბრალოდ, ძალიან მომთმენი და კულტურული ადამიანია.
– ცხადია, «საზოგადოებრივ მაუწყებელს» არ ვგულისხმობ, მაგრამ როგორ ფიქრობ, მედია ბიზნესია თუ არა? თუ გაინტერესებს, ჩემს აზრს აქვე გეტყვი: დიახ, მედია ბიზნესია და ვიდრე ამას საქართველოშიც არ ვაღიარებთ, ჩვენი საშველი არ იქნება!
– «საზოგადოებრივ მაუწყებელს» ფულს საზოგადოება უხდის და ესეც ერთგვარი საზოგადოებრივი ბიზნესია, ანუ საზოგადოებამ ამ არხით ყველა ის ინფორმაცია უნდა მიიღოს, რისი მიღებაც სურს, მაგრამ ნეტავ, საზოგადოებას ვინმემ ჰკითხა, ბუკა პეტრიაშვილის ცოლის, ეკა მიშველაძის მიერ წაყვანილი პოლიტიკური თოქ-შოუს ყურება უნდა თუ არა?
რაც შეეხება ბიზნესს, გეთანხმები, რომ საქართველოში მედიას ბიზნესად კი არა, სამწუხაროდ, პროპაგანდის იარაღად თვლიან. როგორც კი, ჩვენთან მედია ბიზნესი გახდება და მედია-მენეჯერები, ანუ ამ ბიზნესის მმართველები მიხვდებიან, რომ საზოგადოება ბევრად უფრო მაღალი სტანდარტის პროდუქციას იმსახურებს, ყველაფერი დალაგდება!
– …ეკა მიშველაძე, თუნდაც იქიდან გამომდინარე, წეღან დასავლური მედიაინსტიტუტების წერილები რომ ახსენე, «ოცნებისთვის» ერთგვარი ბომბი ხომ არაა?
– ჩემი არავის უნდა ეშინოდეს, რადგან ყველანაირი ძალადობის წინააღმდეგი ვარ, მაგრამ მგონია, რომ ადამიანები გონიერებას გამოიჩენენ და ვიმედოვნებ, საკუთარ თავს არ დააზარალებენ და ცუდად აშენებულ შენობას კიდევ ერთ აგურს არ გამოაცლიან!
– «ოცნებელებთან» ამ თემაზე ტეტ-ა-ტეტ გისაუბრია?
– კი… ბევრი გამომეხმაურა, შენ ხომ ასეთი და ისეთი ჟურნალისტი ხარ და ვაიმე, შენს გადაცემასაც ხურავენო?!
– ბოლოს, ეკა, დღეს რომ გადაცემა გქონდეს, მთავარ თემად რას აირჩევდი?
– «გაზპრომს». საერთოდ, ასეთ თემებს გვერდს არასოდეს ვუვლი ხოლმე…
– მეც ასე ვარ… წარმატებებს გისურვებ, ეკა!
ესაუბრა ვანო პავლიაშვილი
გაზეთი „ქართული სიტყვა“
