საქართველოსა და თურქმენეთის სტრატეგიული ხედვები ეკონომიკური თანამშრომლობის კუთხით აბსოლუტურად თანხვედრაშია , – ამის შესახებ საქართველოს პრეზიდენტმა, გიორგი მარგველაშვილმა თურქმენეთის პრეზიდენტთან შეხვედრის შემდეგ გამართულ ერთობლივ პრესკონფერენციაზე განაცხადა. მან გურბანგული ბერდიმუჰამედოვს საქართველოში საპასუხო ვიზიტით ჩამოსვლისთვის მადლობა გადაუხადა და მზადყოფნა გამოთქვა, წლის ბოლოს თურქმენეთის ნეიტრალიტეტის 20 წლისთავისადმი მიძღვნილ ღონისძიებებს დაესწროს.
“ჩვენი შეხვედრისას განსაკუთრებული აქცენტი დაეთმო საქართველოსა და თურქმენეთს შორის მიმდინარე ინტენსიური თანამშრომლობების გაღრმავებას რიგი მიმართულებებით. განსაკუთრებული ყურადღება მიენიჭა ჩვენს ქვეყნებს შორის სტრატეგიულ თანამშრომლობას ეკონომიკური განვითარების კუთხით. ამ თვალსაზრისით ჩვენი ერთობლივი სტრატეგიული ხედვები აბსოლუტურად თანხვედრია. თურქმენეთი ძალიან სწორად და სტრატეგიულად ხედავს თავისი ქვეყნის განვითარებას, თანამშრომლობას საქართველოსთან და ეს თანამშრომლობა არის მომგებიანი არამარტო საქართველოსა და თურქმენეთისთვის, არამედ რეგიონისთვის და უფრო გლობალურად, ევრაზიული რეგიონის მრავალი ქვეყნისათვის. ჩვენი ერთობლივი სატრანზიტო და ენერგეტიკული პროექტები და მათი ხედვები იძლევა შესაძლებლობას თურქმენეთის ჭარბი ენერგეტიკული რესურსის ტრანსპორტირებისა ევროპის ბაზრებზე, თურქმენეთში არსებული სხვა რესურსებიის ტრანსპორტირების და ამ თანამშრომლობაში ერთვება არაერთი ქვეყანა”, – განაცხადა გიორგი მარგველაშვილმა.
იმ პროექტებს შორის, რომელზეც განსაკუთრებული აქცენტი გაკეთდა, მარგველაშვილმა ხაზი გაუსვა “ლაპის ლაზულის” და “აგრის” პროექტებს და აღნიშნა, რომ ასეთი თანამშრომლობა წარმატებას მოუტანს თურქმენეთსაც, საქართველოსაც, ავღანეთსაც, თურქეთსაც.
“ეს ის გადაწყვეტილებებია, რომელსაც მოაქვს ეკონომიკური წარმატება, რეგიონისთვის მეტი სტაბილურობა, მეტი უსაფრთხოება. ეს ის ხედვებია, რომელიც აწყობს არამარტო ორ ქვეყანას, არამედ გლობალურად იმ ქვეყნებს, რომლებიც ორიენტირებული არიან რეგიონში სიმშვიდეზე, თანამშრომლობასა და უსაფრთხოებაზე. შესაბამისად, ჩვენ განსაკუთრებულ აქცენტს ვაკეთებთ ამ ვიზიტზე, განსაკუთრებული იმედები გვაქვს და გვჯერა, რომ ჩვენი პარტნიორები და მეგობრები მთელი ევრაზიის კონტინენტის მასშტაბით იმედის თვალით უყურებენ და მხარდაჭერას გამოხატავენ ამ ძალიან მნიშვნელოვანი პროექტების განხორციელებისათვის”, – განაცხადა საქართველოს პრეზიდენტმა და დასძინა, რომ საქართველო და თურქმენეთი ძალიან ეფექტურად თანამშრომლობენ საერთაშორისო არენაზე და ეს თანამშრომლობა გაგრძელდება.
