გიორგი კოდუა მთავრობას ქვეყნის საინვესტიციო პოლიტიკის გადახედვისკენ მოუწოდებს. მისი განცხადებით, ორი დღის წინ ერთ-ერთი არაბი ბიზნესმენი, რომელსაც საქართველოში 25 მილიონიანი ინვესტიცია უნდა განეხორციელებინა, საზღვარზე არ შემოუშვეს. კოდუას განცხადებით, ამის მიზეზად მესაზღვრეებმა სავიზო რეგულაციები დაასახელეს.
„მას აუკრძალეს შემოსვლა საქართველოს ტერიტორიაზე და უკან გააბრუნეს ვიზების და რაღაც რეგულაციების გამო. მისი თანაშემწე თურქეთის მოქალაქე შემოუშვეს, თავად ეს ინვესტორი, მილიონერი პიროვნება, რომელიც მზად იყო ინვესტიციები განეხორციელებინა, არ შემოუშვეს. ჩემთვის გაუგებარია, რატო ხდება ამ ინვესტორების არ შემოშვება და თუ არა აქვთ ინფორმაცია, მოვუწოდებ მთავრობას, რომ მოიკითხონ და ასეთი ქმედებები აღკვეთონ, ჩვენ არ გვჭირდება მათი დახმარება მთავრობიდან, მოგვცენ ჩვენ ბიზნესმენებს საქმიანობის საშუალება,“ – აცხადებს ავიაკომპანია “ეარ კავკასუსის” დამფუძნებელი გიორგი კოდუა.
AIR CAUCASUS-ის წარმომადგენლის გიორგი კოდუას განცხადებას იუსტიციის მინისტრი თეა წულუკიანი პასუხობს. მინისტრი ამბობს, რომ საქართველოს კანონმდებლობაში არის სპეციალური ხელშეწყობის პროგრამები, რომლითაც უცხოელებს შეუძლიათ ისარგებლონ.
“ჩვენს ქვეყანაში არსებობს კანონები, არსებობენ სტრუქტურები ვინც აკონტროლებენ საზღვარს. არსებობს სპეციალური ვიზები ასევე გვაქვს სპეციალური ხელშეწყობის პროექტები. კლასიკური გაგებით თუ ის არ არის ინვესტორი, მაგრამ არის უცხოელი და აქვს ქონება საქართველოში, მას შეუძლია ისარგებლოს საქართველოს მთავრობის სპცეიალური ხელშეწყობის პროგრამით,”- აცხადებს თეა წულუკიანი.
