პარლამენტის საგაზაფხულო სესია დღეს იხურება. კანონმდებლები საკანონმდებლო ორგანოს მუშაობას აფასებენ. უმრავლესობაში ამბობენ, რომ მიუხედავად განსხვავებული მოსაზრებებისა, ნაყოფიერი სესია იყო.
„ჩვენ არ ვართ ნოტარიუსები, ჩვენ ვართ საკანონმდებლო ორგანო, სადაც ბევრი აზრია, საკმაოდ ნაყოფიერი საგაზაფხულო სესია გამოვიდა,“ – განაცხადა ანი მიროტაძემ.
განსხვავებული მოსაზრება აქვთ უმცირესობაში.
„პარლამენტი გადაიქცა ბიძინა ივანიშვილის არაფორმალური, უკანონო, მმართველობის გამმართლებელ ორგანოდ. პარლამენტმა ხელი დააფარა მთავრობას, რომელმაც უნიათობითა და არაკომპეტენტურობით თავი გამოიჩინა,“ – განაცხადა გიორგი ბარამიძემ.
