ქვეყანაში მიმდინარეობს ეროვნული ბანკის უარგუმენტოდ დანაწევრების პროცესი, – ამის შესახებ ეკონომიკურ საკითხებში საქართველოს პრეზიდენტის მრჩეველმა, გიორგი აბაშიშვილმა დღეს გამართულ პრესკონფერენციაზე განაცხადა.
“ქვეყანაში მიმდინარეობს ეროვნული ბანკის უარგუმენტოდ დანაწევრების პროცესი. საუბარია იმ ინსტიტუტზე, რომელიც ყველა საერთაშორისო ორგანიზაციის შეფასებით, ყველაზე მაღალპროფესიონალურად ასრულებს საკუთარ საქმიანობას, მათ შორის – განსაკუთრებით საბანკო ზედამხედველობის სფეროში. ამავდროულად, საუბარია ისეთი ტიპის ცვლილებებზე, რომლებიც ეწინააღმდეგება ევროკავშირთან ასოცირების დღის წესრიგს და საქართველოს მთავრობის განკარგულებას, რომელსაც პრემიერ-მინისტრი აწერს ხელს და, რომელიც სწორედ 2015 წელს ასოცირების დღის წესრიგის სამოქმედო გეგმას ეხება. ეს ყველაფერი ეწინააღმდეგება საერთაშორისო საფინანსო ინსტიტუტების, ბიზნეს-ასოციაციების, ექსპერტების, რამდენიმე არასამთავრობო ორგანიზაციის ძალიან ღია შეფასებებს. სამწუხაროდ, კანონპროექტის ავტორების და არც მათი მხარდამჭერების მხრიდან ამ დრომდე არც ერთი, თუნდაც მცირე პროფესიული არგუმენტები არ ყოფილა წარმოდგენილი იმასთან დაკავშირებით, თუ რატომ უნდა განხორციელდეს ეს ცვლილება. საუბარი იყო მხოლოდ იმაზე, რომ ბატონი ქადაგიძე არის მიუღებელი და საჭიროა მისი ნეიტრალიზაცია. კატეგორიულად დაუშვებლად მიგვაჩნია პიროვნებების გამო ინსტიტუტების ასეთი ნგრევის პროცესი, რომელსაც ახლა აქვს ადგილი”, – განაცხადა აბაშიშვილმა.
საქართველოს პრეზიდენტის მრჩევლის თქმით, ცვლილებების აღნიშნული არგუმენტით განხორციელება “დამაფიქრებელი და შემაშფოთებელია” იმ ფონზეც, როცა გიორგი ქადაგიძეს ეროვნული ბანკის პრეზიდენტის უფლებამოსილება რამდენიმე თვეში ეწურება.
“კიდევ ერთხელ მინდა განვაცხადო: აღნიშნული ცვლილების ძალაში შესვლა ძალიან სერიოზულ საფრთხეს უქმნის მთლიანობაში ქვეყნის მაკროეკონომიკურ სტაბილურობას და მონეტარული პოლიტიკის ეფექტიან განხორციელებას. შესაბამისად, ცვლილებებით გამოწვეულ შედეგებზე შესაბამისი პასუხისმგებლობა მის ყველა მხარდამჭერს ეკისრება”, – აღნიშნა საქართველოს პრეზიდენტის მრჩეველმა.
