ორგანიზაცია “ახალგაზრდა ადვოკატები” მურმან დუმბაძის ხელფასის საბანკო ანგარიშზე ყადაღას მოითხოვს. “ახალგაზრდა ადვოკატების” ხელმძღვანელის, არჩილ კაიკაციშვილის განცხადებით, კანონიერ ძალაში შევიდა ხელვაჩაურის რაიონული სასამართლოს 2014 წლის 8 დეკემბრის გადაწყვეტილება, რომლითაც დადგინდა, რომ მურმან დუმბაძის მიერ 2014 წლის 19 სექტემბერს, აჭარის ტელევიზიის საინფორმაციო გამოშვება ,,დროს” 20:30 სათიან გამოშვებაში და გაზეთ ,,აჭარის” 2014 წლის 23-24 სექტემბრის გამოცემაში ,,ახალგაზრდა ადვოკატების” შესახებ გავრცელებული ცნობები ცილისწამებაა. კერძოდ, მურმან დუმბაძემ განაცხადა, რომ “ახალგაზრდა ადვოკატები” არიან დაქირავებულები, წარმოდგენა არ აქვთ, რა არის საქართველოს კონსტიტუცია, გამოხატვის თავისუფლება, სიტყვის თავისუფლება და საქართველოს პარლამენტის წევრის უფლება-მოვალეობები და თუ ეს ხელისუფლება ასეთ დაქირავებულებს განცხადებებს გააკეთებინებს, მაშინ ნიშნავს, რომ ეს ხელისუფლებაც გადაიქცევა იმ ხელისუფლებად, რომელიც ჩვენ გავუშვით”. დავა მას შემდეგ დაიწყო, რაც ორგანიზაციამ მურმან დუმბაძის განცხადებები აჭარის უმაღლესი საბჭოს საქმიანობის შესახებ აჭარის საკანონმდებლო ორგანოზე ჩარევად შეაფასა. ამჟამად, მურმან დუმბაძემ, სასამართლოს გადაწყვეტილებით, ზემოაღნიშნული განცხადებები, როგორც ცილისწამება, საჯაროდ უნდა უარყოს.
არჩილ კაიკაციშვილის განცხადებით, სასამართლოს ინსტანციებმა მურმან დუმბაძის მიმართვები განუხილველი დატოვა. მისი თქმით, სამართალწარმოების მიზანს წარმოადგენდა მსგავსი ტიპის საქმეებზე შექმნილიყო სასამართლო პრაქტიკა და მაღალი პოლიტიკური თანამდებობის პირებს საკუთარი განცხადებების დროს ყურადღება მიექციათ მესამე სექტორის მიმართ ურთიერთობის პასუხისმგებლობას. მისივე თქმით, “ახალგაზრდა ადვოკატების” პოზიციით და კრიტიკით გაღიზიანებული პოლიტიკოსები ხშირად მიმართავენ ორგანიზაციის საქმიანი რეპუტაციის შელახველი ცნობების გავრცელებას, შესაბამისად, ორგანიზაცია მომავალშიც ერთგულად დაიცავს საქმიანობის პრინციპებს, სახელს და იმედოვნებს, რომ სასამართლოს გზით მიღწეული შედეგები, გაცილებით გასათვალისწინებელი იქნება მაღალი პოლიტიკური თანამდებობის პირებისთვის და შეახსენებთ მათ თმენის ვალდებულებას და კრიტიკის კულტურას.
“ახალგაზრდა ადვოკატებმა”, სასამართლო გადაწყვეტილების შესაბამისად, 2015 წლის 13 მაისს, წერილით მიმართა მურმან დუმბაძეს და მოითხოვა დაზუსტდება, უშუალოდ უზრუნველყოფდა თუ არა პარლამენტის ვიცე-სპიკერი გადაწყვეტილების აღსრულებას. სასამართლოს გადაწყვეტილებაში აღნიშნულია, რომ “თუ მურმან დუმბაძე არ შეასრულებს აღნიშნულ მოქმედებას დადგენილ ვადაში, ,,ახალგაზრდა ადვოკატები” უფლებამოსილია, თვითონ შეასრულოს ეს მოქმედება მოპასუხისგან აუცილებელი ხარჯების ანაზღაურებით”. მურმან დუმბაძეს სასამართლოს კანონიერ ძალაში შესული გადაწყვეტილებიდან 1 თვე ჰქონდა, რათა თავად მოეხდინა გადაწყვეტილების აღსრულება, რაც არ მოახდინა”, – განაცხადა კაიკაციშვილმა.
მისივე თქმით, პარლამენტის ვიცე-სპიკერი მურმან დუმბაძე პატივს არ სცემს სასამართლო გადაწყვეტილებას, რაც სამსახურეობრივი სტატუსიდან გამომდინარე, სასამართლო ხელისუფლების მიმართ გამოხატული შეურაცხმყოფელი ქცევაა. ორგანიზაცია სასამართლო გადაწყვეტილების აღსრულებისთვის აღსრულების ეროვნულ ბიუროს მიმართავს და იმავდროულად მოითხოვს, მურმან დუმბაძის ხელფასის საბანკო ანგარიშს ყადაღა დაედოს, ვინაიდან არსებობს მნიშვნელოვანი საფრთხე, რომ საქართველოს პარლამენტის ვიცე-სპიკერმა, ორგანიზაციის მიმართ არ აანაზღაუროს ცილისწამებით მიყენებული ზიანი და სასამართლო გაადწყვეტილების მედიაში გამოქვეყნების ღირებულება.
