ჩემი უმთავრესი მიზანი იქნება, ყველა ფრონტზე, სადაც შესაძლებელია, საქართველოს გამთლიანებისთვის მაქსიმალურად ეფექტური ნაბიჯების გადადგმა , – ამის შესახებ საქართველოს საგარეო საქმეთა მინისტრმა გიორგი კვირიკაშვილმა “მოამბესთან” ექსკლუზიურ ინტერვიუში განაცხადა და დასძინა, რომ ეს არამარტო მისი, არამედ მთელი მთავრობის მიზანია.
“ბუნებრივია, ქვეყნისთვის, რომელსაც ტერიტორიული მთლიანობა დარღვეული აქვს და აქვს ოკუპაციის პრობლემები, საგარეო პოლიტიკის მნიშვნელობა დეოკუპაციის და საქართველოს ტერიტორიული მთლიანობის აღდგენის კუთხით ვერავითარ შემთხვევაში ვერ გახდება მეორადი”, – განაცხადა კვირიკაშვილმა.
საგარეო-პოლიტიკური უწყების ხელმძღვანელი მიიჩნევს, რომ მიუხედავად ოკუპაციისა, რუსეთთან დიალოგის ფორმატი, მათ შორის, აბაშიძე-კარასინის კომუნიკაცია, აუცილებელია, თუმცა მის გაფართოებას შეუძლებლად მიიჩნევს.
“აბაშიძე-კარასინის ფორმატში განიხილება ჰუმანიტარული და ეკონომიკური საკითხები. ამ ფორმატის გაფართოება, მე მგონი, შეუძლებელია, იმიტომ, რომ იმის იქით არის პოლიტიკური საკითხები და ამისთვის არის ჟენევის ფორმატი, რომელიც მაქსიმალურად უნდა შევეცადოთ, შევინარჩუნოთ და უფრო ეფექტური გავხადოთ. ოკუპაციის პირობებში უნდა გვქონდეს თუ არა აბაშიძე-კარასინის ფორმატი? _ ვფიქრობ, ამ ფორმატმა გარკვეული შედეგები გამოიღო, თუმცა ილუზიები არ უნდა გვქონდეს, რომ 1-2 დღეში მნიშვნელოვანი პრობლემები გადაწყდება. როდესაც ადამიანი თუნდაც ყველაზე რთულ ოპონენტს არ ელაპარაკება და გადის ურთიერთობებიდან, ამით პრობლემები მხოლოდ და მხოლოდ ღრმავდება. ყველაზე მძიმე ოპონენტთან კომუნიკაციაში ყოფნა გაცილებით მნიშვნელოვანია, ვიდრე კომუნიკაციიდან გასვლა. ამიტომ გვაქვს ჩვენ ეს ფორმატები და ვერავითარ შემთხვევაში ვერ მივიღებ კრიტიკას, რომ იგივე აბაშიძე-კარასინის ფორმატი არ უნდა იყოს, ვფიქრობ, ეს ფორმატი აუცილებლად შესანარჩუნებელია“, – განაცხადა კვირიკაშვილმა.
