“ნატო-ს გაფართოების ციკლი არ უნდა შეწყდეს, ეს ჩვენ ოპტიმიზმს გვმატებს”

news
ავტ.: news ივლისი 5, 2015 12:35 განახლებულია

“ნატო-ს გაფართოების ციკლი არ უნდა შეწყდეს, ეს ჩვენ ოპტიმიზმს გვმატებს”

მნიშვნელოვანი

  • საქართველოს თავდაცვის მინისტრი თინა ხიდაშელი საქართველოს ნატო-ში გაწევრიანების პერსპექტივების შესახებ ესპანურ საინფორმაციო სააგენტოს “EFE” ესაუბრა.

სხვა სტატიები

საქართველოს თავდაცვის მინისტრი თინა ხიდაშელი საქართველოს ნატო-ში გაწევრიანების პერსპექტივების შესახებ ესპანურ საინფორმაციო სააგენტოს “EFE” ესაუბრა.

თავდაცვის სამინისტროს ინფორმაციით, მინისტრის ინტერვიუ რამდენიმე წამყვანმა ესპანურმა ინტერნეტგამოცემამაც გაავრცელა.

უწყების განმარტებით, ნატო-ს გენერალური მდივანი, იენს სტოლტენბერგი საქართველოს აგვისტოში ესტუმრება და ვიზიტის ფარგლებში, ვაზიანის სამხედრო ბაზაზე, თბილისთან ახლოს, ნატო-საქართველოს ერთობლივი წვრთნისა და შეფასების ცენტრი გაიხსნება.

„გენერალური მდივანი ესტუმრება ქვეყანას, რომელიც ალიანსის დიდი ხნის და სანდო პარტნიორია. ქვეყანას, რომელსაც ჯერ კიდევ 2008 წელს ბუქარესტის სამიტზე ნატო-ს წევრობას დაპირდნენ; ქვეყანას, რომელიც აქტიურად იღებს მონაწილეობას ნატო-ს მისიებში ავღანეთში“, – განუცხადა საქართველოს თავდაცვის მინისტრმა თინათინ ხიდშელმა ესპანურენოვან სააგენტოს “EFE”.

როგორც ინტერვიუშია აღნიშნული, საქართველო, სხვადასხვა პროგრამების ფარგლებში, ნატო-სთან 1994 წლიდან თანამშრომლობს. გასული წლის ნატო-ს უელსის სამიტზე კი გადაწყდა, რომ საქართველოში ერთობლივი ცენტრი გაიხსნებოდა. რაც შეეხება ავღანეთის მისიას, საქართველომ ნატო-ს არაწევრ ქვეყნებს შორის ყველაზე დიდი კონტინგენტი გააგზავნა – 1700-ზე მეტი სამხედრო მოსამსახურე. საერთაშორისო მისიაში 30 ქართველი სამხედრო მოსამსახურე დაიღუპა.

თინა ხიდაშელის განცხადებით, ცენტრის გახსნასთან დაკავშირებით, საქართველოში მუდმივად იქნება წარმოდგენილი ნატოს რვა ოფიცერი.

„ჩვენ ასევე განვაცხადეთ, რომ მონაწილეობას მივიღებთ ნატო-ს სწრაფი რეაგირების ძალებში (NRF). რა ფორმით იქნება საქართველო წარმოდგენილი, მოლაპარაკებების დროს გაირკვევა. ჩვენი მხრიდან პოლიტიკური ნება უკვე გამოვხატეთ“,- აღნიშნა თავდაცვის მინისტრმა.

მისი თქმით, ის არ დაიშურებს ძალისხმევას, რომ ერთი წლის შემდეგ,
ვარშავაში ნატოს სამიტზე საქართველომ ჩრდილო-ატლანტიკურ ალიანსში გაწევრიანების სამოქმედო გეგმა (MAP) მიიღოს, რომელიც შემდეგი საფეხურია ნატო-ს სრულუფლებიანი წევრობისკენ.

„ჩვენთვის ძალიან მნიშვნელოვანი და ღირებულია, რომ ნატო-მ კარი გაუღო მონტენეგროს. ეს არის ნათელი გზავნილი სკეპტიკოსებისთვის, რომლებიც ეჭვობენ, რომ ნატო განაგრძობს ღია კარის პოლიტიკას. ნატო-ს გაფართოების ციკლი არ უნდა შეწყდეს. ეს ჩვენ ოპტიმიზმს გვმატებს“, – განაცხადა თინა ხიდაშელმა.

მისი თქმით, 2008 წლის რეფერენდუმის შედეგებმა აჩვენა, რომ საქართველოს მოსახლეობის სამი მეოთხედი მხარს უჭერს საქართველოს ნატო-ში გაწევრიანებას და თუ ვარშავაში ნატო-ს სამიტზე საქართველო ვერ მიიღებს გაწევრიანების სამოქმედო გეგმას, ეს მოსახლეობის იმედგაცრუებას გამოიწვევს.

„მე არ ვეთანხმები მოსაზრებას, რომ „ძველი ევროპის“ ქვეყნები საქართველოს ნატო-ში გაწევრიანების საკითხისადმი სკეპტიკურად არიან განწყობილნი. საქართველოსადმი ნდობის ყველაზე ნათელი დადასტურება იყო ივნისში საფრანგეთის გადაწყვეტილება, საქართველოსთვის მიეყიდა ყველაზე თანამედროვე ჰაერსაწინააღმდეგო თავდაცვის საშუალებები, რომელიც საქართველოში მალე შემოვა და უპრეცედენტოდ დაიცავს საქართველოს ცას“, – აღნიშნა თინა ხიდაშელმა.

მან ხაზი გაუსვა, რომ ჯერ არ მოუსმენია რომელიმე ოფიციალური პირის განცხადება, რომ საქართველო არ იმსახურებს ნატოს წევრობას.

როგორც ინტრევიუშია აღნიშნული, ნატო-ს გენერალური მდივნის საქართველოში ვიზიტამდე, მთავარი პარტნიორის, აშშ-ის მხარდაჭერის განსამტკიცებლად, რომელთანაც საქართველომ სტრატეგიული პარტნიორობის ქარტია ჯერ კიდევ 2009 წელს გააფორმა, საქართველოს თავდაცვის მინისტრი აგვისტოს შუა რიცხვებში ვაშინგტონს ეწვევა და თავის კოლეგასთან, ეშტონ კარტერთან მოლაპარაკებებს გამართავს.

“ჩვენ მთელ რიგ საკითხებს განვიხილავთ, მათ შორის ნატო-სთან თანამშრომლობის თემატიკასაც”, – განაცხადა მინისტრმა.

საქართველოს ნატო-ში მისწრაფებასთან დაკავშირებით რუსეთის მხრიდან უარყოფით რეაქციაზე, მინისტრმა აღნიშნა, რომ რუსეთის ხელისუფლება საქართველოს, როგორც დამოუკიდებელი სახელმწიფოს არსებობით უკმაყოფილოა, მაგრამ ამით საქართველოს არჩევანი არ იცვლება.

“რაც შეეხება უკრაინას, იქ არსებულ მდგომარეობას ჩვენ შეშფოთებით ვადევნებთ თვალს, რამდენადაც 2008 წელს იგივე გადავიტანეთ. არ გამოვრიცხავ, რომ უკრაინაში კვლავ შესაძლოა, ფართომასშტაბიანი საბრძოლო მოქმედებები განახლდეს. თუმცა, მსურს მჯეროდეს რაციონალიზმის. დღეს მსოფლიო “ისლამური სახელმწიფოს” მხრიდან ძალიან სერიოზული ტერორიზმის საფრთხის წინაშე დგას, მათ შორის ჩრდილოეთ კავკასიაშიც. არავის, პირველ რიგში კი რუსეთს, არ აქვს იმის კომფორტი, რომ ეს საფრთხე არ გააცნობიეროს” – განაცხადა მინისტრმა.

საქართველოს თავდაცვის მინისტრის თქმით, საქართველომ არ უნდა დაუშვას, რომ ტერორიზმის წინააღმდეგ ბრძოლაში, რუსეთი თავის ერთადერთ მეკავშირესთან, დასავლეთთან კონფრონტაციაში შევიდეს, რადგანაც თავად რუსეთი შეიძლება აღმოჩნდეს უფრო სერიოზული გამოწვევის წინაშე.

“აშკარაა, რომ რუსეთში მთელი მსოფლიოს წინაშე მდგარი ახალი საფრთხეების მასშტაბს აცნობიერებენ. მსურს მჯეროდეს, რომ დასავლეთსა და რუსეთს შორის პარტნიორობის ხიდი სწორედ ტერორიზმთან ერთობლივი ბრძოლის სფეროში გაჩნდება. მე დიდი ოპტიმიზმით ვუყურებ ვაშინგტონისა და ბრიუსელის პოტენციალს ამ მიმართულებით”, – განაცხადა ხიდაშელმა.

news
ავტ.: news ივლისი 5, 2015 12:35 განახლებულია

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


9,509
ვიზიტორი
დღეში
Powered By Google Analytics