ზურაბ ხარატიშვილი: ოპოზიცია ძალიან ახლოს არის იმ ზღვართან, რომ დარბაზებიდან ქუჩაში გადაინაცვლოს

news
ავტ.: news სექტემბერი 23, 2015 20:02

ზურაბ ხარატიშვილი: ოპოზიცია ძალიან ახლოს არის იმ ზღვართან, რომ დარბაზებიდან ქუჩაში გადაინაცვლოს

ოპოზიციის შეფასებით, ხელისუფლებას სიტუაცია პოლიტიკური კრიზისისკენ მიჰყავს, – ამის შესახებ განცხადებები პარლამენტში, ფრაქცია “თავისუფალი დემოკრატების” ღია სხდომაზე გაკეთდა, სადაც დისკუსია საარჩევნო სისტემის შეცვლის საკითხზე გაიმართა.
ზურაბ ხარატიშვილის შეფასებით, ოპოზიცია ძალიან ახლოს არის იმ ზღვართან, რომ დარბაზებიდან ქუჩაში გადაინაცვლოს და პროტესტის რადიკალურ ფორმებს მიმართოს.
“ერთი წელია არასაპარლამენტო ოპოზიციის ინტერფრაქციული ჯგუფი კონსტრუქციულ ფორმატში ცდილობს იმ საარჩევნო რეფორმის ინიცირებას, რომელიც საზოგადოებასა და ქვეყანაში დიდი ხანია მომწიფდა. სამწუხაროდ, ხელისუფლება თავისი დამოკიდებულებით, უფრო სწორედ ამ პროცესისადმი სრული იგნორირებით ძალიან ამწვავებს სიტუაციას და პოლიტიკური კრიზისისკენ მიჰყავს”, – განაცხადა ხარატიშვილმა.
არასაპარლამენტო ოპოზიციის კიდევ ერთი წარმომადგენლის, გიორგი ახვლედიანის აზრით, ხელისუფლება ძალიან დიდ ფასს გადაიხდის არაადეკვატურობისთვის საზოგადოებისა და პოლიტიკური სპექტრის მიმართ. ახვლედიანის თქმით, ის, რომ დღევანდელ შეხვედრაზე უმრავლესობის წარმომადგენლები არ გამოცხადნენ, მათ პოლიტიკურ ნებას გამოხატავს.
საპარლამენტო ფრაქცია “თავისუფალი დემოკრატების” ღია სხდომაზე, რომელშიც ყველა პოლიტიკური პარტიის წარმომადგენელმა მიიღო მონაწილეობა, უმრავლესობა არ მივიდა. განხილვის საგანი საარჩევნო სისტემა და ამ მიმართულებით კონსტიტუციასა და საარჩევნო კანონმდებლობაში განსახორციელებელი ცვლილებები იყო.
საპარლამენტო და არასაპარლამენტო ოპოზიცია საარჩევნო სისტემის იმდაგვარ შეცვლას ითხოვს, რომლის მიხედვით, 75 საპარლამენტო მანდატი ერთიანი პროპორციული სიით გადანაწილდება, ხოლო დანარჩენი 75 მანდატი სამხარეო პროპორციული წესით.
ოპოზიციამ კონსტიტუციაში ცვლილებების განხორციელების მიზნით ხელმოწერების შეგროვება დაიწყო. ამასთან, ოპოზიციური პარტიები მმართველი გუნდისგან ინტერპარტიული ჯგუფის შექმნას ითხოვენ, სადაც სწორედ საარჩევნო სისტემაზე მოხდება პოზიციების შეჯერება და გადაწყვეტილებების მიღება.

news
ავტ.: news სექტემბერი 23, 2015 20:02

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


6,376
ვიზიტორი
დღეში
Powered By Google Analytics