თურქეთის იუსტიციის სამინისტრომ აშშ-ს დამატებითი დოკუმენტები გაუგზავნა ისლამის მქადაგებლის, ფეხტულა გიულენის ექსტრადაციისათვის, რომელსაც ანკარა სახელმწიფო გადატრიალების მცდელობის ორგანიზებაში ადანაშაულებს.
“ჩვენ აშშ-ში დოკუმენტების ოთხი პაკეტი გავაგზავნეთ “ტერორისტების ხელმძღვანელის” საექსტრადაციოდ. ჩვენ მათ კიდევ მეტ მტკიცებულებებს წარვუდგენთ, ვიდრე სურთ” – განაცხადა თურქეთის პრემიერმა ბილანი იილდირიმმა დღეს პარლამენტის სხდომაზე გამოსვლისას.
გიულენმა თურქეთში მომხდარ მოვლენებთან დაკავშირებით განაცხადა, რომ მას არანაირი კავშირი არა აქვს მომხდართან და დაგმო პუტჩი. მან , ასევე განაცხადა, რომ მზად არის სამშობლოში ექსტრადაციისათვის.
რეჯეპ ერდორანმა გუშინ თქვა, რომ აშშ-თურქეთს შორის დამნაშავეების გადაცემის შესახებ შეთანხმება არსებობს. “როცა აშშ საკუთარი მოქალაქის გადაცემას ითხოვს, ჩვენ ამ თხოვნას ვასრულებთ. ასეთ საკითხებში ურთიერთგაგება უნდა იყოს” – თქვა თურქეთის ლიდერმა.
“თუკი ჩვენ სტრატეგიული პარტნიორები ვართ, შეასრულეთ ჩვენი თხოვნა. ჩვენ გაძლევდით ტერორისტებს, რომელსაც თქვენ ითხოვდით. ახლა მოგვეცით ის, რომელიც ტერორისტების ჩვენს სიაში გვყავს” – თქვა ერდორანმა.
გუშინ, თურქეთის პრემიერ-მინისტრის მიერ გავრცელებული ინფორმაციით, სამხედრო გადატრიალების მცდელობისას 208 ადამიანი დაიღუპა, მათ შორის 60 პოლიციელი, სამი ჯარისკაცი და 145 სამოქალაქო პირი. 1491 პირი კი დაიჭრა.
