თურქეთის პოლიციამ სტამბოლის ღამის კლუბზე თავდასხმაში ეჭვმიტანილი დააკავა. ინფორმაციას ამის შესახებ თურქული სახელმწიფო მედია ავრცელებს.
დაკავებული უზბეკეთის მკვიდრი, აბდულქადირ მაშარიპოვია, რომელმაც, გამოძიების ცნობით, ახალი წლის ღამეს ღამის კლუბ Reina-ში 39 ადამიანი მოკლა.
თურქული მედიის ინფორმაციით, ეჭვმიტანილი სტამბოლის პროვინციის ესენიურთეს რაიონში ჩატარებული სპეცოპერაციის დროს დააკავეს. ტელეკომპანია TRT-ის ცნობით, ეჭვმიტანილთან ერთად მისი ოთხი წლის შვილი იმყოფებოდა, მამაკაცი თავისი ყირგიზი მეგობრის სახლში დააკავეს.
ამასთან, გავრცელებული ინფორმაციით, ეჭვმიტანილი თურქეთის ქალაქ კონიაში ნაქირავებ ბინაში მეუღლესთან და ორ შვილთან ერთად ცხოვრობდა.
1 იანვრის ღამით თავდამსხმელი სტამბოლის ღამის კლუბთან ტაქსით მივიდა, შემდეგ კი ავტომატი მანქანის საბარგულიდან ამოიღო. მან შესასვლელში მდგარი პოლიციელი და ტურისტული სააგენტოს თანამშრომელი მოკლა და შენობაში შევიდა, სადაც 400-მდე ადამიანი იმყოფებოდა. თავდამსხმელი დაახლოებით შვიდი წუთის განმავლობაში ისროდა, რა დროსაც 100-ზე მეტი გასროლა განახორციელა. მოგვიანებით კი მან გამოიცვალა ტანსაცმელი და მიიმალა.
ახალი წლის ღამით განხორციელებული თავდასხმის შედეგად 39 ადამიანი დაიღუპა. მსხვერპლთა უმრავლესობას უცხოელები წარმოადგენენ.