სურსათის ეროვნულმა სააგენტომ ცოფის საწინააღმდეგო იძულებითი ვაქცინაცია ჩაატარა

კახეთის რეგიონში, დედოფლისწყაროს მუნიციპალიტეტის სოფელ სამთაწყაროში უპატრონო ძაღლის მიერ ადამიანების და პირუტყვის დაკბენის შემთხვევა დაფიქსირდა.

სურსათის ეროვნული სააგენტოს ინფორმაციით, ფაქტის გამოვლენისთანავე ადგილზე გავიდნენ სააგენტოს კახეთის რეგიონული სამსახურის ვეტერინარები.

მათივე ინფორმაციით, ლაბორატორიული კვლევისთვის აღებული იყო პათმასალა, რის შედეგადაც ძაღლს ცოფი დაუდასტურდა.

სააგენტოს კახეთის რეგიონული სამმართველოს ვეტერინარებმა რისკის ზონაში ჩაატარეს იძულებითი ვაქცინაცია და შესაბამისი ვეტერინარული ღონისძიებები. დედოფლისწყაროს საზოგადოებრივი ჯანდაცვის სამსახურის მიერ გამოვლენილი იქნა ძაღლის მიერ დაკბენილი და კონტაქტირებული პირები, რომელთაც უტარდებათ ანტირაბიული ვაქცინაცია.

სურსათის ეროვნულმა სააგენტომ 2017 წელს ცოფის საწინააღმდეგო ვაქცინაცია ჩაუტარა 298 734 სულ ცხოველს, მათ შორისაა 279 690 სული ძაღლი/კატა და 19 044 სული მსხვილფეხა პირუტყვი.

ცოფი საშიში ინფექციური დაავადებაა, რომელიც გადადის დაკბენით, დადორბვლით ან დაკაწვრით. ცოფით ავადდება ადამიანიც. დროულად ჩატარებული ღონისძიებების შედეგად დაავადების თავიდან აცილება შესაძლებელია.

banner
წინა სტატიაში(Video) რუსეთში პირდაპირ ეთერში ჟურნალისტებმა სტალინის გამო იჩხუბეს
შემდეგი სტატიათბილისში 2 მოზარდი დაჭრეს