სასამართლოს გადაწყვეტილებით რუსთაველის გამზირზე, აქციაზე 11 ივნისს დაკავებულ ფარნაოზ ჭკადუასა და გიორგი რუხაიას სამდღიანი ადმინისტრაციული პატიმრობა შეეფარდათ, ხოლო გიორგი მაჩაიძე, გიორგი ხაბურზანია და დავით ოსიყმაშვილი 1000-ლარიანი ჯარიმის სანაცვლოდ გაათავისუფლეს. ხუთივე მათგანს ბრალად ედება პოლიციის კანონიერი მოთხოვნისადმი დაუმორჩილებლობა.
მოსამართლემ ცალკე განიხილა აქციაზე დაკავებული ბესიკ გაზდელიანის საქმე, რომელსაც ოთხდღიანი ადმინისტრაციული პატიმრობა შეეფარდა.
სასამართლო პროცესს „ნაციონალური მოძრაობის” წარმომადგენლები ნიკა მელია, ზაალ უდუმაშვილი და ლევან ხაბეიშვილი ესწრებოდნენ. პროცესზე “ახალი საქართველოს” ლიდერი გიორგი ვაშაძეც მივიდა.
