,,რუსეთის გააქტიურებული პროპაგანდა იმის მანიშნებელია, რომ ევროკავშირმა საქართველოს მხარდაჭერა უნდა გააძლიეროს”

საქართველოს თავდაცვის მინისტრმა, თინათინ ხიდაშელმა სლოვაკეთში ვიზიტი შეაჯამა. თავდაცვის სამინისტროს ინფორმაციით, მინისტრი სლოვაკეთის რესპუბლიკაში იმყოფება, სადაც ბრატისლავაში მე-10 საიუბილეო გლობალური უსაფრთხოების ფორუმში მიიღო მონაწილეობა.

ფორუმის ფარგლებში თავდაცვის მინისტრმა 14 ორმხრივი შეხვედრა გამართა სლოვაკეთის პრეზიდენტთან, უცხოელ კოლეგებთან, საგარეო საქმეთა მინისტრებთან, ნატო-სა და ევროკავშირის მაღალი რანგის პირებთან, ასევე ბიზნესსექტორის წარმომადგენლებთან.

როგორც თავდაცვის სამინისტროში აცხადებენ, სლოვაკეთის მხრიდან საქართველომ სრული მხარდაჭერა მიიღო, როგორც ევრო-ატლანტიკურ სტრუქტურებში ინტეგრაციის გზაზე, ისე ვიზალიბერალიზაციის პროცესში. ნატო-საქართველოს ურთიერთობების გაძლიერება, არსებითი პაკეტის იმპლემენტაციის პროცესი და საქართველოს მოლოდინები ვარშავაში დაგეგმილ ნატო-ს სამიტზე ის მთავარი საკითხები იყო, რაც განიხილა თინათინ ხიდაშელმა ალიანსის წარმომადგენლებთან – ნატოს გენერალური მდივნის მოადგილესთან ალექსანდერ ვერშბოუსთან, გენერალური მდივნის მოადგილის თანაშემწესთან პოლიტიკურ საკითხებსა და უსაფრთხოების პოლიტიკაში ჯეიმს აპატურაისთან და სახალხო დიპლომატიის საკითხებში ალიანსის გენერალური მდივნის თანაშემწესთან, ელჩ ტაჩან ილდემთან.

ევროკომისიის გაფართოების დირექტორატის ხელმძღვანელთან ქრისტიან დანიელსონთან ორმხრივ შეხვედრაზე კი, საქართველოსა და ევროკავშირს შორის თანამშრომლობის კიდევ უფრო გაღრმავებაზე გამახვილდა ყურადღება. როგორც ქრისტიან დანიელსონმა აღნიშნა, რუსეთის გააქტიურებული პროპაგანდა იმის მანიშნებელია, რომ ევროკავშირმა უნდა გააძლიეროს საქართველოს მიმართ მხარდაჭერა.

თინათინ ხიდაშელმა სლოვაკეთში ვიზიტი პროდუქტიულად შეაფასა. „საინტერესო თემებით დატვირთული ღონისძიება იყო, მათ შორის, ნატო-სა და ევროპის უსაფრთხოების მომავალზე საუბრით. ჩვენ გავმართეთ 14 შეხვედრა როგორც ევროპის თავდაცვის მინისტრთან, ასევე ჩვენს სხვა პარტნიორ ორგანიზაციებთან. სამი შეხვედრა გვქონდა ნატო-ს ფარგლებში, შევხვდით იმ კომპანიების წარმომადგენლებს, რომლებიც უსაფრთხოების სფეროში მუშაობენ. ასეთი ღონისძიებების პლუსი სწორედ ის არის, რომ ყოველთვის შედეგიანია ორმხრივი ურთიერთობების თვალსაზრისით. იმედი მაქვს, ჩვენ, ყველანი ერთად, ერთობლივი მცდელობით მოვახერხებთ, რომ მსოფლიო იყოს უფრო უსაფრთხო ხვალ და ზეგ და საქართველოს თავდაცვისუნარიანობა კიდევ უფრო განმტკიცდეს,“ – განაცხადა საქართველოს თავდაცვის მინისტრმა.

banner
წინა სტატიაშიესპანელმა სამართალდამცველებმა ტერორიზმში ეჭვმიტანილი ორი პირი დააკავეს
შემდეგი სტატია„გვაქვს სრული მხარდაჭერის იმედი, ჩვენი პარტნიორების მხრიდან”