რამდენიმე დღის წინ რუსეთიდან საქართველოში გამოადეპორტეს “კანონიერი ქურდი”, როვსან ჯანიევის ნათლული ლაშა ბარათელი, მეტსახელად “ჭია”. საინტერესოა, რომ საქართველოში, სადაც “ნათლობის” ქონა დანაშაულად ითვლება, ბარათელის სამშობლოში დაბრუნებაზე რეაქცია არ ჰქონიათ სამართალდამცველებს – რუსული პორტალი “დანაშაულებრივი რუსეთი” წერს, რომლის წყაროს მონაცემებით, “ჭია” საქართველოდან თურქეთში აპირებს გადასვლას.
“ჭია” და მისი მეგობარი, ასევე “კანონიერი ქურდი” სერგო ცოცხანაშვილი რუსეთში საემიგრაციო კანონის დარღვევის გამო დაახლოებით ერთი თვის წინ დააკავეს. ორივე მათგანი, 2014 წელს თურქეთში, “კანონიერი ქურდების” ერთ-ერთ შეკრებაზე მონათლეს.
