რუსეთის პრეზიდენტმა ვლადიმირ პუტინმა ბრიტანეთში რუსეთის დაზვერვის ყოფილი თანამშრომლის სერგეი სკრიპალისა და მისი ქალიშვილის მოწამვლის საქმეზე კომენტარი გააკეთა. “ბიბისის” კორესპოდენტის შეკითხვაზე, რუსეთი არის თუ არა მოწამვლასთან რაიმე კავშირში, პუტინმა უპასუხა: “თქვენ ჯერ მანდ გაერკვიეთ რა ხდება და შემდეგ განვიხილიოთ”.
ეს პუტინის პირველი კომენტარია სკრიპალის მოწამვლაზე, მანამდე კრემლის სახელით მისმა პრეს-მდივანმა დიმიტრი პესკოვმა გააკეთა განცხადება. “მისმინეთ, ჩვენ აქ სოფლის მეურნეობით ვართ დაკავებული. როგორც ხედავთ, ეს ადამიანების ცხოვრების პირობების გაუმჯობესებისკენ არის მიმართული – თქვენ კი მე რაღაც ტრაგედიებზე მიყვებით. თქვენ ჯერ მანდ გაერკვიეთ რა ხდება და შემდეგ გავიხილიოთ” – სიტყვასიტყვით ასე ჟღერს პუტინის კომენტარი.
სერგეი სკრიპალი და მისი ქალიშვილი 4 მარტს ბრიტანეთის პატარა ქალაქ სოლსბერიში ქალაქის ცენტრში იპოვეს მოწამლულები. მათი მდგომარეობა სტაბილურად მძიმეა.
დღეს ბრიტანეთის პრემიერ-მინისტრი ლონდონში ეროვნული უსაფრთხოების საბჭოს სხდომას ატარებს, სადაც, ასევე სკრიპალის საქმეზე ისაუბრებენ.
