პოლიტიკურ საკითხებში პრეზიდენტის მრჩეველის ფიქრია ჩიხრაძის განცხადებით, პრეზიდენტის ავლაბრის სასახლეში ყოფნა სამართლებრივად აბსოლუტურად გამართულია. ამის შესახებ მან ჟურნალისტებთან საუბრისას განაცხადა.
“მე ვფიქრობ, აქ ყველაფერი ნათელია სამართლებრივი თვალსაზრისით. პრეზიდენტი არასოდეს არ დაუშვებს იმას, რომ ის იყოს სამართლებრივი სივრციდან გასული და მე მგონი, ეჭვიც არავის გეპარებათ იმაში, რომ პრეზიდენტის ამ სასახლეში ყოფნა სამართლებრივად აბსოლუტურად გამართულია”, – აღნიშნა ფიქრია ჩიხრაძემ.
ყოფილი პრემიერ-მინისტრი, ბიძინა ივანიშვილი პრეზიდენტის უარს ათონელის რეზიდენციაში გადასვლასთან დაკავშირებით “ცინიზმის ძალიან მაღალ დონედ” აფასებს. როგორც ივანიშვილმა ჟურნალისტებს განუცხადა, “ეს უნდა დასრულდეს და დასრულდება, იმის მიუხედავად მას ეს სურს თუ არ სურს”.
