პრეზიდენტმა ბარაკ ობამამ იაპონიის ქალაქი ხიროსიმა მოინახულა, სადაც ამერიკამ მეორე მსოფლიო ომის დროს ატომური იარაღი ჩამოაგდო.
ობამა აშშ-ს პირველი პრეზიდენტია, რომელმაც ხიროსიმა მოინახულა. მან იაპონიის პრემიერ-მინისტრთან სინძიო აბესთან ერთად ხიროსიმას მშვიდობის მემორიალური პარკი მოინახულა და ატომური დარტყმის შედეგად მსხვერპლთა ძეგლი ყვავილებით შეამკო.
“71 წლის წინ სიკვდილი ჩამოვარდა ციდან და ამან მსოფლიო შეცვალა” – განაცხადა ობამამ. პრეზიდენტმა დაამატა, რომ მსოფლიომ უნდა იპოვოს იმის საშუალებები, რომ მსგავსი ტრაგედია არ განმეორდეს. ის ასევე რამდენიმე იაპონელს შეხვდა, რომლებმაც ეს შეტევა გადაიტანეს.
1945 წელს ხიროსიმაზე ატომური ბომბი აშშ-ს პრეზიდენტის ჰარი ტრუმანის ბრძანებით ჩამოაგდეს. შედეგად 140 ათასი ადამიანი გარდაიცვალა.რამდენიმე დღის შემდეგ იგივე განმეორდა ნაგასაკიზე, სადაც 74 ათასი ადამიანი დაიღუპა.
