გენერალური აუდიტორის პოსტზე წარდგენილი ირაკლი მექვაბიშვილი ახალ თანამდებობაზე არჩევის შემთხვევაში გამოწვევებს ელის.
მოსალოდნელი გამოწვევების თაობაზე მან ოპოზიციონერი დეპუტატის, ირმა ნადირაშვილის კითხვის პასუხად გაამახვილა ყურადღება. კერძოდ, ნადირაშვილმა უმცირესობის სხდომაზე აღნიშნა, რომ დღეს მთავარი გამოწვევა არის კორუფცია, ბიუჯეტის უკანონოდ ხარჯვა და ნეპოტიზმი. აქვე ნადირაშვილმა წინა გენერალურ აუდიტორთან, ლაშა თორდიასთან დაკავშირებული ინციდენტი გაიხსენა და განაცხადა, რომ როცა თორდიას მიერ გადადგმული ნაბიჯები მთავრობის ერთ-ერთ კლანს არ მოეწონა, ის სცემეს. ნადირაშვილმა მექვაბიშვილს მიმართა კითხვით, თუ როგორ აპირებს დამოუკიდებლობის შენარჩუნებას და სახელმწიფო აუდიტორის სამსახურისთვის სახის შენარჩუნებას. ნადირაშვილმა მექვაბიშვილს ასევე მიმართა, გადის თუ არა ფიზიკურ მომზადებას სავარჯიშო დარბაზში.
”არ დაგიმალავთ, რომ ეს ჩემთვის არის გამოწვევა, მაგრამ შინაგანად, მორალურად მზად ვარ ეს გამოწვევა მივიღო და გავუმკლავდე მათ შორის ფიზიკურადაც. სავარჯიშო დარბაზში დავდივარ, ისე ხშირად არა, როგორც მინდა, მაგრამ მაინც დავდივარ. რაც შეეხება დამოუკიდებლობას, კიდევ ერთხელ ვიმეორებ, რომ აუდიტის სამსახურის დამოუკიდებლობა არის კანონით დაცული, პარლამენტთან ერთად ვიმუშავებ, რომ დამოუკიდებლობა იყოს გამყარებული. ეს არის მნიშვნელოვანი”, – განაცხადა ირაკლი მექვაბიშვილმა ირმა ნადირაშვილის კითხვის პასუხად.
