საქართველოს ექს-პრეზიდენტმა, პარტია “Рух нових сил”-ის ლიდერმა მიხეილ სააკაშვილმა კიევში 19 ნოემბერს გამართულ “სახალხო ვეჩეზე” განაცხადა, რომ იმოგზაურებს უკრაინაში და ხალხს მოუწოდებს სახალხო იმპიჩმენტის ჩატარებისკენ. ამის შესახებ იუწყება საინფორმაციო პორტალი “ГОРДОН”. “3 დეკემბერი – “სახალხო იმპიჩმენტის” დაწყების თარიღია. 3 დეკემბრამდე ვაკეთებთ იმას, რაც უკვე დავიწყეთ. ჩვენ ჩამოვაყალიბეთ საინფორმაციო ცენტრები უკრაინის ყველა რეგიონული მნიშვნელობის ქალაქში. ჩვენ ძალიან ბევრი მხარდამჭერი გვყავს, ჩვენ გვაქვს ენერგია, ჩვენი რიგები ახალი ხალხით ივსება”, – აღნიშნა მან. მიხეილ სააკაშვილმა იმედი გამოთქვა, რომ მოსამზადებელი პროცესი წარმატებით ჩაივლის. “ჩვენ ყველაფერი გამოგვივა…არავითარი პროვოკაციები…ჩვენი გეგმაა – მშვიდობიანი მოქმედებები”, – დასძინა მან.
შეგახსენეთ, 17 ოქტომბერს უკრაინის უმაღლესი რადის შენობის მიმდებარე ტერიტორიაზე რამდენიმე პოლიტიკური პარტიის და მოძრაობის აქტივისტებმა “კარვების ქალაქი” გასალეს. ისინი მოითხოვენ ქვეყანაში მასშტაბური პოლიტიკური რეფორმების გატარებას.