მინდა ცალსახად განვაცხადო, რომ “ნატო-საქართველოს სწავლება” ემსახურება რეგიონალურ უსაფრთხოებას და მშვიდობას, ამიტომ არც ერთ მეზობელს საფუძველი არ აქვს ამ წვრთნებში დაინახოს საფრთხე, – ამის შესახებ საქართველოს თავდაცვის მინისტრმა ლევან იზორიამ ჟურნალისტებს განუცხადა.
მისი თქმით, აღნიშნული წვრთნები საქართველოს შეიარაღებული ძალების ნატო-სთან თავსებადობის მიზნით, ქვეყნის უსაფრთხოების ინტერესებიდან გამომდინარე აუცილებელია.
„ჩვენ ასეთი ტიპის წვრთნებს მომავალშიც გავაგრძელებთ სწორედ მშვიდობისა და უსაფრთხოების უზრუნველყოფის მიზნით”, – განაცხადა ლევან იზორიამ.
“ნატო-საქართველოს სწავლება 2016” აქტიურ ფაზაში გადავიდა. სწავლების ფარგლებში საქართველოს შეიარაღებული ძალების წარმომადგენლები კრიზისის საპასუხო ოპერაციებს დაგეგმვისა და აღსრულებისთვის საჭირო უნარ-ჩვევებს ნატო-ს წევრი და პარტნიორი ქვეყნების წარმომადგენლებთან ერთად აუმჯობესებენ.
დღეს სწავლების მიმდინარეობის გასაცნობად “ნატო-საქართველოს წვრთნისა და შეფასების ერთობლივ ცენტრს” 130-ზე მეტი მაღალი დონის წარმომადგენლისგან შემდგარი დელეგაცია ეწვია. საქართველოს პრეზიდენტი გიორგი მარგველაშვილი, პრემიერ-მინისტრი გიორგი კვირიკაშვილი, თავდაცვის მინისტრი ლევან იზორია, ნატო-ს “მოკავშირეთა ტრანსფორმაციის სარდლობის” (ACT,) “ნატოს სახმელეთო ძალების სარდლობის” (Landcom), “ნატო-ს გაერთიანებული ძალების წვრთნის ცენტრის” (JFTC) და ნატოს ცენტრების წარმომადგენლებთან ერთად ეწვევნენ. სწავლების მიმდინარეობას საქართველოში აკრედიტებული ელჩები, საერთაშორისო ორგანიზაციების (“ევროკავშირი”, “წითელი ჯვრის საერთაშორისო კომიტეტი”) და სამხედრო საზოგადოების წარმომადგენლებიც დაესწრნენ.
