„ლარის გაუფასურების მთავარი მიზეზი არის საქართველოს მთავრობა. ლარი საქართველოს ფინანსთა სამინისტრომ გააუფასურა,” – ეს განცხადება ფრაქცია „ნაციონალური მოძრაობის” თავმჯდომარემ, რომან გოცირიძემ პარლამენტის საშემოდგომო სესიის პირველ სხდომაზე გააკეთა. ოპოზიციის წევრი ეროვნული ვალუტის კურსის ცვლილებაში მთავრობას ადანაშაულებს.
„ფინანსთა სამინისტრომ ახალი ინსტრუმენტი შემოიღო, 5 ივლისს დაიწყო ბიუჯეტში წლობით ნაგროვები ნაშთების კომერციულ ბანკებზე გასესხება. თქვენ იცით, რა რაოდენობის ფული მისცა სესხად ბოლო 2 თვის განმავლობაში ფინანსთა სამინისტრომ, ხაზინამ ე.წ. ახლადშემოღებული სადეპოზიტო აუქციონების მეშვეობით? – ნახევარი მილიარდი ლარი,”- განაცხადა რომან გოცირიძემ.
ოპოზიციის წევრის ბრალდებებს ფინანსთა სამინისტროში უპასუხეს და რომან გოცირიძე პოლიტიკურ სპეკულაციაში დაადანაშაულეს.
