“ბრიტანეთის მთავრობამ რუსეთთან სირიის კონფლიქტის დარეგულირების საკითხზე იმის მიუხედავად უნდა განაგრძოს მოლაპარაკებები, რომ მოსკოვთან ურთიერთობა დაძაბულია” – განაცხადა ბრიტანეთის პრემიერ-მინისტრმა დევიდ კემერონმა.
“ეჭვს გარეშეა, სირიის შემთხვევაში ყველა მოთამაშე უნდა მონაწილეობდეს, იქნება ეს საუდის არაბეთი, ირანი თუ მოსკოვი. ყველა უნდა იყოს პროცესში ჩართული” – განაცხადა კემერონმა “ალ-ჯაზირას” ეთერში.
გაეროს ეგიდით მოლაპარაკებები სირიის მთავრობასთან და ოპოზიციასთან 25 იანვარს არის დაგეგმილი.
ბრიტანეთსა და რუსეთს შორის ურთიერთობა 2006 წელს, რუსი ყოფილი სპეცსამსახურების თანამშრომლის, ალექსანდრ ლიტვინენკოს ლონდონში მკვლელობის შემდეგ დაიძაბა.
