კალაშნიკოვი – უფრო მარტივია უბრალო ენით საუბარი, ვიდრე იარაღის ენით

მოსკოვი: რუსეთის სახელმწიფო სათათბიროს დსთ-ის ქვეყნებთან ურთიერთობის კომიტეტის თავმჯდომარე ლეონიდ კალაშნკოვი Front News International-თან ექსკლუზიურ ინტერვიუში რუსი პარლამენტარების ჯგუფის საქართველოში დაგეგმილ ვიზიტზე, საქართველო-რუსეთი-ნატო-ს სამმხრივ შესაძლო მოლაპარაკებებსა და თბილისში მიხეილ სააკაშვილის პარტიასთან შეხვედრის მზადყოფნის შესახებ საუბრობს.

– 2013 წელს თქვენ არ შეგიშვეს საქართველოში, როგორ მოიქცევთ ამჯერად, თუ დაგეგმილი ვიზიტის დროს კვლავ არ შეგიშვებენ?

– როგორ შეიძლებოდა არ შევეშვით საქართველოში, როცა საბჭოთა კავშირის მერე იქ ნამყოფი არ ვარ და არც ვაპირებ. არ მითხოვია ვიზა არასოდეს. ეს არის ნიშნავს, რომ ვიზის აღებას მარტივად შევძლებ, ეს უკვე მარტივი არ არის. ალბათ, იქნება პრობლემები, თუმცა ვთხოვთ. მომცემენ – მომცემენ, არ მომცემენ – არა. ჯერჯერობით იქ წასვლას არ ვაპირებ, ასეთი გადაწყვეტილება არ მიმიღია. მოგვიანებით ვიფიქრებ.

– მაგრამ თქვენი ვიზიტი დაანონსდა

– დიახ, შეხვედრა დაანონსდა. ახლა საქართველოში ყველა შვებულებაშია. თუ მიმიწვევენ, წავალ. ჯერჯერობით მიდის დეპუტატი ეკლესიის ხაზით, ჯგუფთან, რომელიც თავდაპირველად არაფორმალურ შეხვედრას მოამზადებს, შემდეგ კი ის ახალი წევრებით შეივსება. თუ მე არ ვიქნები, სხვები წავლენ.

– რის განხილვას გეგმავთ?

– ვგეგმავთ იმ პრობლემების განხილვას, რომელიც წარმოიქმნება – საჰაერო მიმოსვლა ირღვევა, ვიზებთან დაკავშირებითაც შეგვიძლია დახმარება და სიტუაციის გაუმჯობესება, ყოველშემთხვევაში შევეცდებით ამის გაკეთებას. არ შეიძლება ჰუმანიტარული კუთხით ჩვენი თანამშრომლობა შეწყდეს იმის გამო, რომ ჩვენ ამჟამად დიპლომატიური ურთიერთობა არ გვაქვს და არ ნიშნავს, რომ ჩვენ ერთმანეთისთვის უცხოები გავხდით. ამ თვალსაზრისით ძალიან ბევრი რამეა, რომელიც გვაინტერესებს: დიპლომატიური, სავიზო, ორმხრივი ვიზიტები, კულტურული გაცვლა, რელიგიური. ეს ყველაფერი ჩვენ გვაახლოებს და პარლამენტი სწორედ ამით უნდა დაკავდეს. იქიდან გამომდინარე, რომ იქ ხელისუფლებაში ზოგიერთმა გადაწყვიტა და ვცხოვრობთ როგორც მტრული სახელმწიფოები, ეს საკითხები თავისით არ წყდება. ვფიქრობ, ჩვენ შეგვიძლია ხელი შევუწყოთ და დავეხმაროთ მათ ამ თვალსაზრისით. ასე რომ, ვნახოთ რა გამოვა.

– ანუ თქვენ საქართველოს რუსეთთან შესარიგებლად მიდიხართ?

– არა, მე რა, რომის პაპი ვარ საქართველო რუსეთთან შევარიგო? საქართველოს და რუსეთს თავისი უთანხმოებები აქვთ, რომელიც წყდება იქ, სადაც უნდა გადაწყდეს. მე არ ვარ ყველა საკითხის გადაწყვეტაში უფლებამოსილი, მე მხოლოდ შემიძლია ხელი შევუწყო და ამას გავაკეთებ.

– ქართველმა დეპუტატმა ადა მარშანიამ განაცხადა, რომ ეს იქნება შეხვედრა ფორმატში რუსეთ-საქართველო პლუს ნატო.

– მან შემოგვთავაზა ჩვენ ამ არაფორმალურ შეხვედრაზე. როდესაც ჩვენ გამოვთქვით უკმაყოფილება იმასთან დაკავშირებით, რომ ძალიან ბევრი სწავლება იმართება ნატო-ს ჯარების მონაწილეობით, იმაზე მეტიც კი, ვიდრე სააკაშვილის დროს და ეს არ ეხმარება, მხოლოდ ამწვავებს ჩვენ ურთიერთობებს, მაშინ მან შემოგვთავაზა: “მოდით, სამივე შევხდეთ, თქვენ გაქვთ რუსეთი-ნატო-ს დიალოგი და მოდით, ვცადოთ რუსეთი-ნატო-საქართველო”. მათ აქვთ თავიანთი დიალოგი, ჩვენ – ჩვენი, ახლა შევეცდებით გავაერთიანოთ. როგორც ვხდები, ნატო-ში არ იწვიან სურვილით მონაწილეობა მიიღონ ამ სამმხრივ შეხვედრაში.

– რატომ ფიქრობთ, რომ ნატო-ს ეს არ სურს?

– მე მოვისმინე საქართველოში ნატო-ს წარმომადგენლის განცხადება.

– რა შეიძლება იყოს ამის მიზეზი?

– მათ არ სურთ უხერხულ კითხვებზე პასუხის გაცემა. ბევრი წლის განმავლობაში ვიყავი ნატო-ს საპარლამენტო ასამბლეის წევრი და როდესაც მაგალითად, ლიბიაში ყველაფერი მშვიდად იყო და ემბარგო მხოლოდ იწყებოდა, სამწუხაროდ, ჩემ კითხვებზე პასუხები ვერ მივიღე. შემდეგ ვიყავი ნატო-ს საპარლამენტო ასამლეის დეპუტატი, ასევე ვერ მივიღე პასუხები ბევრ კითხვაზე, შემდეგ დაიწყო საბრძოლო მოქმედებები. ეს ძალიან ცუდია, თუ ჩვენ არ შეგვიძლია საპარლამენტო ენაზე ვისაუბროთ, შემდეგ ყველაფერი საბრძოლო მოქმედებებით მთავრდება. ისევე როგორც აქ მინდა, ამ თვალსაზრისით მათ გამოვლინონ თავიანთი გაგება, რომ ადვილია სიტყვების ენაზე საუბარი, ვიდრე იარაღის ენაზე. ეს მათზეა დამოკიდებული – მოისურვებენ შევხდებით, შემდეგ დავგეგმავთ მსგავს შეხვედრებს.

– თქვენ ჯგუფმა შესაძლოა, კარასინი-აბაშიძის შეხვედრები შეცვალოს, რომელიც პრაღაში იმართება ხოლმე?

– არა, მას არ შეუძლია კარასინი-აბაშიძის შეხვედრების შეცვლა. დიალოგი, რომელიც კარასინი-აბაშიძის ხაზით იმართება, ეს არის დიპლომატიური მოლაპარაკებები, რომელიც შეიძლება იყოს, საპარლამენტო მოლაპარაკებებთან ერთად. ისინი ერთმანეთს არ უშლიან, მხოლოდ ავსებენ. თქვენ იცით, თითოეულ სახელმწიფოს ბევრი სხვადასხვა მიმართულება აქვს და ისინი ერთმანეთს არ უშლიან, პირიქით – ეხმარებიან. ნებისმიერ შემთხვევაში, მე კარგად ვიცნობ კარასინს, მისგან მხოლოდ მხარდაჭერა და დახმარება იგრძნობა, თუ საპარლამენტო დონეზე ამის საჭიროებაა.

– შესაძლებელია თქვენი ჯგუფის და კარასინი-აბაშიძის ჯგუფის ერთობლივი შეხვედრები?

– სრულიად შესაძლებელია, თუ საჭიროება იქნება, მაგრამ ჯერჯერობით ამის აუცილებლობა არ არის. თუ ჩვენ დიპლომატიურ უწყებებში რაიმე კითხვები გაჩნდება, ჩვენ მათ გადაწყვეტთ. ამისთვის რაღაც გადაწყვეტილებები ან დამატებითი შეხვედრები არ მჭირდება. მე მაქვს ჩვენი ამხანაგების დახმარებისა და მხარდაჭერის იმედი საკითხებში, როცა მე ეს მჭირდება. ვერანაირ პრობლემას ვერ ვგრძნობ.

– ცოტა ხნის წინ უკრაინის პრეზიდენტი იმყოფებოდა საქართველოში და მოინახულა საოკუპაციო ხაზი. საქართველო რუსეთს ე.წ. საზღვრის გადმოწევაში ადანაშაულებს.

– დადანაშაულება – დადანაშაულებაა, ისინი არა მხოლოდ ადანაშაულებენ, არ დავიწყებ შეფასებას – 700 მეტრი, 600 მეტრი, აქეთ-იქეთ. არსებობს სახელმწიფო სახელწოდებით აფხაზეთი და სახელმწიფო სახელწოდებით – სამხრეთ ოსეთი, მათთან გადაწყვიტონ ეს საკითხები, თუმცა გადაწყვეტის ნაცვლად მათ მიიღეს ოკუპაციის შესახებ კანონი. ამ ჯგუფთან ამის შესახებაც ვისაუბრეთ – “თქვენ საერთოდ აპირებთ ამ ადამიანებთან საუბარს, თუ თქვენ თვლით მათ ადამიანებად?”. გვიპასუხეს – დიახ. თქვენ ყველაფერი მოაქციეთ ოკუპირებული ტერიტორიების შესახებ კანონის ქვეშ და საუბარი არ გსურთ. ყველასთან მომყავს ასეთი მაგალითი: აწ განსვენებული პრეზიდენტი ჰეიდარ ალიევი, როდესაც ხელისუფლებაში მოვიდა, ბაქოში ადამიანები დადიოდნენ იარაღით, აღჭურვილობით, დივიზიის პოლკი იბრძოდა, კლავდნენ, აძევებდნენ იქედან რუსებს, ებრაელებს, სომხებს. როგორც კი ჰეიდარ ალიევი ხელისუფლებაში მოვიდა, მისი პირველი საქმე იყო, რომ მივიდა ამბოხებულთა პოლკოვნიკთან მარტო, თუმცა მას ეუბნებოდნენ – “ვისთან მიდიხართ, ის ტერორისტია”, როგორც ახლა ამბობენ სამხედრო ფორმირება თუ ამბოხებული – მხედველობაში მაქვს, მაგალითად დონბასი – მან კი უპასუხა – “არა, ეს ხომ ჩემი ხალხია, ჩემი ქვეყნის მოქალაქეები და მათთან უნდა მივიდე”. მივიდა და მალევე, 2 წელიწადში სიტუაცია დაწყნარდა და საკითხები გადაწყდა. სხვათაშორის, რა დაპირებებსაც ამბობდა პოროშენკო არჩევნების წინ, არცერთი არ გაუკეთებია. იმის ნაცვლად, რომ მოაწყოს მოლაპარაკებები, გარბის ტრამპთან, მერკელთან, ახლა საქართველოში ჩავიდა სხვა სახელმწიფოს საზღვართან. თუ გინდა საკითხის გადაწყვეტა, გადაწყვიტე ისე, როგორც გადაჭრა ჰეიდარ ალიევმა. ახლა ბაქო მშვიდია, ლამაზი, სადაც რუსებიც არიან, ებრალებიც და სხვებიც. ასე რომ, ამ თვალსაზრისით დიდი ხანია, ცნობილია, როგორ უნდა მოგვარდეს კონფლიქტი. ნუ გარბიხარ ოკეანის იქეთ, იქ არავინ გელის, თავისი პრობლემებიც ყოფნით.

– ქართულ ოპოზიციასთან საუბარს თუ აპირებთ?

– რატომაც არა, ყოველთვის ვსაუბრობ ოპოზიციასთან. თუ ასეთი შეხვედრა იქნება, აუცილებლად შევხდები. ვის გულისხმობთ ოპოზიციას საქართველოში? თუ თქვენ მხედველობაში გყავთ “ქართული ოცნება”, არა მხოლოდ შევხვდებოდი მმართველ “ქართულ ოცნებას”. რამდენადაც ჩემთვის ცნობილია, “ქართულ ოცნებასაც” სურდა საუბარი. მოდით, საკითხები, რომელიც ჩვენ გვყოფს, ბარიერს მიღმა დარჩეს, გადავწყვიტოთ ის საკითხები, რაც შეგვიძლია და ასეთი ბევრია. ტერიტორიული საკითხები კი ის არ არის, რომლის გადაწყვეტაც ჩვენ დღეს შეგვიძლია. ეს არის სამი სახელმწიფოს საქმე და თავად გადაწყვიტონ.

– მხედველობაში მქონდა ყოფილი პრეზიდენტის მიხეილ სააკაშვილის პარტია

– თუ მოისურვებენ, შევხდები. ამ თვალსაზრისით არ მაქვს ცალმხრივი მიმართულება. მე კომუნისტი ვარ, რომ იცოდეთ. თქვენი ევროპარლამენტარებისგან განსხვავებით, რომლებიც საუბრობენ პუტინის, ბრეჟნევის ან სტალინის ორმაგ სტანდარტებსა და მიდგომებზე, საუბრობენ ჩეხ აჯანყებულებზე, დისიდენტებზე, თავად კი ახლა ევროპაში არ გვიშვებენ. ახლა თქვენც იგივეს ამბობთ საქართველოზე. რისი გეშინიათ, საუბრის? ვუთხარი მე მათ. თქვენ ხომ თავად ამბობთ, რომ სიტყვის თავისუფლების შეზღუდვა არ შეიძლება… ასეა აქაც. მზად ვარ სააკაშვილის პარტიასთან შესახვედრად. თუ დაეხმარება ეს რუსულ-ქართულ ურთიერთობებს, შეხვედრაზე გავიგებთ. ასეთების არ მეშინია, პირიქით, სიამოვნებით ვმონაწილეობ.

– შესაძლებელია თუ არა, რომ თქვენმა ვიზიტმა საქართველოში პრეზიდენტების პუტინის და მარგველაშვილის შეხვედრას შეუწყოს ხელი?

– ამისთვის ყველაფერს გავაკეთებდი, მით უფრო, რომ პრეზიდენტმა ვლადიმერ პუტინმა ცოტა ხნის წინ გამოთქვა თავისი პოზიცია მათ შორის დიპლომატიურ შესაძლებლობებზე, სავიზო რეჟიმთან დაკავშირებით. რაც ჩემზე იქნებოდა დამოკიდებული, ყველაფერს გავაკეთებდი.

– მსგავსი შეხვედრის ორგანიზებაზე მოლაპარაკებები უკვე დაიწყო?

– არ ვიცი, არ ვმუშაობ საგარეო საქმეთა სამინისტროში და არ შემიძლია, ეს გითხრათ.

banner
წინა სტატიაშიპოროშენკო-ლუკაშენკოს შეხვედრაზე ,,FEMEN,,-ის მკერდშიშველი აქტივისტი(ვიდეო)
შემდეგი სტატიაპალესტინამ ისრაელთან დიპლომატიური ურთიერთობა გაწყვიტა