ისრაელის თავდაცვის სამინისტრომ, მდინარე იორდანეს დასავლეთ სანაპიროზე მორიგი 2,5 ათასი სახლის მშენებლობის შესახებ განაცხადა – ეს უკვე მეორე გადაწყვეტილებაა პალესტინის ოკუპირებულ ტერიტორიებზე საცხოვრებელი ფართების აშენების შესახებ, მას შემდეგ, რაც აშშ-ს პრეზიდენტი დონალდ ტრამპი გახდა. უწყების მიერ გავრცელებული განცხადების თანახმად, მშენებლობის პროექტი თავდაცვის მინისტრმა ავიგდორ ლიბერმანმა და პრემიერმა ბინიამინ ნეთანიახუმ დაამტკიცეს.
მიმდინარე მომენტისთვის დაახლოებით 500 ათასი ებრაელი ცხოვრობს შენობებში, რომელიც პალესტინის ოკუპირებულ ტერიტორიებზე გაშენდა.
გაერომ, რამდენიმე კვირის წინ მიღებული რეზოლუციით, ისრაელს პალესტინის ტერიტორიებზე მშენებლობები აუკრძალა.
