კულტურის პალატის ინიციატივით, სრულიად საქართველოს კათოლიკოს-პატრიარქმა, უწმინდესმა და უნეტარესმა, ილია მეორემ დღეს საპატრიარქოში ინდური ფილმის ,,ზიტა და გიტას“ ვარსკვლავი ჰემა მალინი მიიღო.
კულტურის პალატის ინფორმაციით, ცნობილ ინდოელ მსახიობს ქველმოქმედებისთვის პალატის პრეზიდენტმა დავით ოქიტაშვილმა საპატიო ჯილდო გადასცა, კერძოდ, გულის ფორმის მინანქრის გულსაკიდი. საქართველოს პატრიარქმა აღნიშნა, რომ საქართველოს ძალიან უყვარს ინდოეთი.
,,მე ორჯერ ნამყოფი ვარ ინდოეთში. შევხვდი ინდირა განდის და ვიყავით შტატ კერალაში, სადაც არის მართლმადიდებელი ეკლესია. თქვენ ძალიან ცნობილი ბრძანდებით მთელ მსოფლიოში და ძალიან მოხარული ვართ, რომ საქართველოში ჩამობრძანდით“, – მიმართა ინდოელ მსახიობს უწმინდესმა. პატრიარქმა მსახიობს საჩუქრად მის მიერ დაწერილი საგალობლების დისკი და ეპისტოლეების კრებული ინგლისურად გადასცა. პატრიარქის თხოვნით ჰემა მალინიმ ინდური ცეკვა შეასრულა და თან თითოეული ცეკვის ილეთის მნიშვნელობა განმარტა.
,,მოხარული ვარ საქართველოში ვიზიტით და მსურს, კიდევ ერთხელ ვიხილო პატრიარქი ინდოეთში. მე პოლიტიკაშიც ვარ ჩართული და ინდოეთის მთავარი პარტიის ფრაქციის თავმჯდომარე ვარ. პოლიტიკა არის ზუსტი პლატფორმა იმისთვის, რომ გაიგო, რა სურს ხალხს. მე მზად ვარ ჩემი კომპეტენციის ფარგლებში, თუ იქნება ჩემი თანადგომა საჭირო ჩავერთო საქველმომქედო ღონისძიებებში და კულტურის პალატასთან თანამშრომლობით, შევიტანო წვლილი ქართველი ბავშვების სიცოცხლის გადასარჩენად“, _ განაცხადა ჰემა მალინმა. ინდოელი მსახიობი აპირებს, დაეხმაროს კულტურის პალატის შვილობილს ლუკა ჩხარტიშვილს, რომელიც უმძიმესი პაციენტია.
