პრემიერ-მინისტრ გიორგი კვირიკაშვილთან „ქართული ოცნების“ ოფისში გამართულ შეხვედრაზე შიდა საპარლამენტო საქმიანობაზე, საარჩევნოო კოდექსში შესაძლო ცვლილებებსა და არასაპარლამენტო ოპოზიციის მიერ შეთავაზებულ წინადადებებზე იმსჯელეს. – ამის შესახებ ჟურნალისტებს საპარლამენტო უმრავლესობის წარმომადგენლებმა განუცხადეს, რომლებიც აღნიშნულ შეხვედრას ესწრებოდნენ. შეხვედრაზე ასევე იმყოფებოდა „რესპუბლიკური პარტიის“ თავმჯდომარე ხათუნა სამნიძე.
როგორც ხათუნა სამნიძემ განაცხადა, საუბარი იყო შესაძლო ცვლილებებზე საარჩევნო კოდექსში, ასევე სხვადასხვა წინადადებებზე, რომლებიც არსებობს არასაპარლამენტო და საპარლამენტო ოპოზიციის მხრიდან.
როგორც საპარლამენტო უმრავლესობის ლიდერმა, ზვიად კვაჭანტირაძემ განაცხადა, შეხვედრა გაიმართა კოალიციური პოლიტსაბჭოს ფორმატში. მისივე თქმით, ძირითადი საკითხები იყო შიდასაპარალმენტო განსახილველი თემები, მათ შორის საკითხები, რომელიც დაკავშირებულია საარჩევნო კოდექსთან და ასევე არასაპარლამენტო ოპოზიციიდან მომდინარე შენიშვნები.
„მომავალი კვირის დასაწყისში ალბათ შედგება კომუნიკაცია და ვფიქრობთ, რომ იქნება პოზიტიური განხილვა არასაპარლამენტო ოპოზიციასთან“, – განაცხადა ზვიად კვაჭანტირაძემ,
კითხვაზე, განიხილეს თუ არა შეხვედრაზე საარჩევნო სიები, ზვიად კვაჭანტირაძემ აღნიშნა, რომ პოლიტსაბჭოს ფორმატში ამაზე საუბარი ზედმეტია, რადგან გადაწყვეტილება მიღებულია და კოალიციაში შემავალი ყველა სუბიექტი მომავალ არჩევნებზე კენჭს ცალ-ცალკე იყრის.
თავის მხრივ, ”მრეწველების” ერთ-ერთმა ლიდერმა ზურაბ ტყემალაძემ აღნიშნა, რომ შეხვედრაზე საუბრის ძირითადი თემა საპარლამენტო მუშაობა იყო. კერძოდ, რა საკითხები დგას დღის წესრიგში, რაზე არის სამსჯელო, რას სჭირდება დამატებითი კონსულტაციები და ა.შ.
”კონსერვატიული პარტიის” ერთ-ერთმა ლიდერმა გიგა ბუკიამ კი განაცხადა, რომ შეხვედრაზე ერთ-ერთი საკითხი იყო არასაპარლამენტო ოპოზიციის მიერ შეთავაზებული წინადადებები. ბუკიას თქმით, მათ აქვთ ხუთპუნქტიანი წინადადებები, რომელიც არაერთხელ გამოთქმულა. როგორც გიგა ბუკიამ აღნიშნა, ის არის სამუშაო ჯგუფში და პროცესი ინტენსიურად მიმდინარეობს.
„ჩვენ არაერთხელ გვითქვამს, რომ ვაპირებთ მათთან ურთიერთობა თანამშრომლობის ფორმატში გავაგრძელოთ. ვცდილობთ შეძლების ფარგლებში მათი მოთხოვნები გავითვალისწინოთ. უახლოეს დღეებში მათ მივაწოდებთ ინფორმაციას, თუ რის გათვალისწინებას შეძლებს ხელისუფლება მათი მოთხოვნებიდან“, – განაცხადა გიგა ბუკიამ.
შეხვედრა „ქართული ოცნების“ ოფისში უკვე დასრულებულია.
