განმუხურში, სადაც „ჯემ ფესტი“ მიმდინარეობს, სამართალდამცველებმა კიდევ ერთი ადამიანი დააკავეს. როგორც „თაიმერს“ შსს-ში განუცხადეს, ერთი პირი ნარკოტიკების უკანონო შეძენა-შენახვის ბრალდებით არის დაკავებული.
შსს-ში ამ ეტაპზე არ აკონკრეტებენ დაკავებულის ეროვნებას და მისგან ამოღებული ნარკოტიკული საშუალებების რაოდენობას. როგორც უწყებაში განმარტავენ, ჩანიშნულია შესაბამისი ექსპერტიზები და საქმესთან დაკავშირებით დეტალების საზოგადოებას მოგვიანებით მიეწოდება.
სამართალდამცველებმა „ჯემ ფესტის“ ტერიტორიაზე გუშინ ირანის მოქალაქეც დააკავეს. სამართალდამცველები მას ასევე ნარკოტიკების უკანონო შეძენა-შენახვას ედავებიან. ირანის მოქალაქის ჩხრეკის შედეგად პოლიციამ დიდი ოდენობით სხვადასხვა დასახელების ნარკოტიკული საშუალებები ამოიღო.
შეგახსენებთ, რომ დაუზუსტებელი სუბსტანციის და ნივთიერების ტოქსიური ეფექტის დიაგნოზით, ბოლო დღეების განმავლობაში ზუგდიდის საავადმყოფოში რამდენიმე ადამიანი „ჯემ ფესტიდან“ გადაიყვანეს, მათგან ერთ-ერთის, 22 წლის გოგონას გადარჩენა ვერ მოხერხდა.
