ამერიკის გამოძიების ფედერალური ბიუროს (FBI) თარჯიმანი, რომელსაც საიდუმლო ინფორმაციასთან ჰქონდა წვდომა და „ისლამური სახელმწიფოს“ წევრის საქმიანობა უნდა შეესწავლა, 2014 წელს სირიაში მალულად გაემგზავრა და ტერორისტს ცოლად გაჰყვა, – ამის შესახებ ინფორმაციას CNN-ი ავრცელებს.
ტელეკომპანიის ცნობით, თარჯიმანმა ხელმძღვანელობა მოატყუა, თითქოს სხვაგან მიემგზავრებოდა, მისი ქმარი კი გააფრთხილა, რომ FBI-ს დაკვირვების ქვეშ იყო.
ტერორისტი, რომელსაც FBI-ს თანამშრომელი ცოლად გაჰყვა, გერმანელი რეპერია, რომელიც „ისლამურმა სახელმწიფომ“ გადაიბირა და მის პროპაგანდისტულ, მათ შორის ადამიანების სიკვდილით დასჯის ვიდეოებში ხშირად ფიგურირებს.
CNN-ის ინფორმაციით, FBI-ს თანამშრომელი მალევე მიხვდა, რომ შეცდომა დაუშვა, კვლავ შეერთებულ შტატებში დაბრუნდა, სადაც დააპატიმრეს, თუმცა სპეცსამსახურებთან თანამშრომლობის სანაცვლოდ, მხოლოდ ორწლიანი პატიმრობა მიუსაჯეს.
