როდესაც პრეზიდენტი უშიშროების საბჭოს მოწვევას გადაწყვეტს, თუ რაიმე გადაუდებელი წინააღმდეგობა არ მაქვს, მაშინ საბჭოს უნდა დავესწრო და მე ასეც მოვიქცევი, – ამის შესახებ ჟურნალისტებს პარლამენტის თავმჯდომარემ დავით უსუფაშვილმა განუცხადა.
“აქ არ არის აუცილებელი იყო პარლამენტის თავმჯდომარე, საკმარისია ვიყოთ ამ ქვეყნის ჩვეულებრივი მოქალაქე, რომ ვიცოდეთ, რომ კონსტიტუციური წესრიგი არის დასაცავი. კონსტიტუცია არის დასაცავი, კონსტიტუციური უფლებამოსილებები ამა თუ იმ პირების მიერ არის შესასრულებელი და ყველა ვცდილობთ, ეს გავაკეთოთ – მათ შორის მეც. “უშიშროების საბჭოს შესახებ” კანონში ბოლო ცვლილებებით პარლამენტის თავმჯდომარეს საბჭოში ცოტა სხვა სტატუსი მიეცა. მანამდე პარლამენტის თავმჯდომარეს ჰქონდა უფლება უშიშროების საბჭოს, არაწევრის სტატუსით, თავისი შეხედულებისამებრ დასწრებოდა. ახალი ცვლილებებით პარლამენტის თავმჯდომარე უშიშროების საბჭოს წევრია. უშიშროების საბჭოს მოწვევის საკითხს პრეზიდენტი წყვეტს. ამიტომ როდესაც იგი ასეთი საბჭოს მოწვევას გადაწყვეტს, თუ არ მაქვს რაიმე გადაუდებელი, შეუძლებელი წინააღმდეგობა, მაშინ მე საბჭოს უნდა დავესწრო და ასეც მოვიქცევი”, – აღნიშნა დავით უსუფაშვილმა.
პარლამენტის თავმჯდომარის ცნობით, 4 დეკემბრისთვის ის თბილისში იქნება და უშიშროების საბჭოს სხდომას დაესწრება.
