ხორავას ქუჩაზე მომხდარი დაპირისპირებისას მოკლული არასრულწლოვნის დავით სარალიძის მამა , ზაზა სარალიძე ამბობს, რომ პროკურატურაზე ზეწოლასა და შანტაჟს 51-ე სკოლის მოსწავლის, მიხეილ კალანდიას ოჯახი ახორციელებს.
სარალიძე ამბობს, რომ თავად პროკურატურის მოქმედებები უმყარებს ეჭვებს, რომ ყოფილი პროკურორი მირზა სუბელიანი და მისი სიმამრი, ყოფილი პარლამენტარი ბორის კაკუბავა კალანდიას გადარჩენის მიზნით პროკურატურაზე ზეწოლას ახდენს.
„ყველანაირ ეჭვს თავად პროკურატურა მიმყარებს. თუნდაც სუბელიანი რომ ზემოქმედებას ახდენს პროკურატურასა და მოწმეებზე, პლუს ბორის კაკუბავა რომ ზეწოლას ახდენს მოწმეებზე. ცდილობენ, რომ თავის ოჯახის წევრის დანაშაული არ გამოიკვეთოს. ისევ ვიტყვი, რომ მიხეილ კალანდია უნდა იყოს დაკავებული ინციდენტს რომ დავანებოთ თავი, ჩვენების შეცვლის გამო,“- აცხადებს დავით სარალიძის მამა, ზაზა სარალიძე.
