ბიძინა ივანიშვილი: ჩემი უსაყვარლესი რეჟისორები არიან ელდარ შენგელაია და გია დანელია

საქართველოს კულტურის პალატის ორგანიზებით, კინოთეატრ “რუსთაველის” წინ ლეგენდარული ქართველი რეჟისორის, ელდარ შენგელაიას ვარსკვლავი საზეიმოდ გაიხსნა.
დღეს ელდარ შენგელაიას 83 წელი შეუსრულდა. ვარსკვლავის გახსნის ცერემონიამდე, რეჟისორისადმი მიძღვნილი საზეიმო საღამო გაიმართა, სადაც ნაჩვენები იყო ნაწყვეტები მისი ცნობილი კინოფილმებიდან. სუხიშვილების მონაწილეობით შესრულდა ცეკვა “ხორუმი”, რის შემდეგაც ქართველმა პრიმა-ბალერინამ, ნინო ანანიაშვილმა დასთან ერთად ვარსკვლავის წინ საბალეტო ნომერი შეასრულა.

“ძალიან ბევრი ხალხი მოვიდა ამ საღამოზე, აქ დედაჩემის ვარსკვლავია და მის გვერდით რომ ინება ჩემი ვარსკვლავი, ეს არის ჩემთვის მნიშვნელოვანი. დიდი მადლობა ყველას, ტელევიზიას, ბატონ ბიძინას, რომელიც მობრძანდა. სამწუხაროდ, მთავროის წევრები არ იყვნენ, რაღაც სხდომა იყო, მაგრამ ამ ყველაფერს გადაიღებენ და ალბათ ყველა ნახავენ ამ საღამოს. დიდი მადლობა ყველას”, – განაცხადა ელდარ შენგელაიამ.

ვარსკვლავის საზეიმო გახსნის ცერემონიას ოჯახის წევრები, ქართველი ხელოვანები, კულტურის სფეროს წარმომადგენლები და საზოგადოებისთვის ცნობილი სახეები ესწრებოდნენ. ღონისძიება კულტურის პალატის პრეზიდენტის, დავით ოქიტაშვილის ორგანიზებით ჩატარდა.

“ამ პროექტის აზრი არის ის, რომ ადამიანს სიცოცხლეშივე გადავუხადოთ მადლობა. ვარსკვლავი მას გაუხსნა მისმა საყვარელმა მაყურებელმა. კიდევ ერთხელ ვულოცავ ბატონ ელდარს დაბადების დღეს”, – განაცხადა დავით ოქიტაშვილმა.

ღონისძიების რეჟისორები იყვნენ გოჩა კაპანაძე და ბასა ფოცხიშვილი.

ვარსკვლავის გახსნას და საღამოს საქართველოს ყოფილი პრემიერ-მინისტრი ბიძინა ივანიშვილიც ესწრებოდა. “ჩვენ ვართ განებივრებული დიდი რეჟისორებით, ჩემი უსაყვარლესი და გამორჩეული რეჟისორები გახლავან ელდარ შენგელაია და გია დანელია”, – განაცხადა ბიძინა ივანიშვილმა.

banner
წინა სტატიაშიკატალონიის მუნიციპალიტეტმა ესპანეთის მეფე პერსონა ნონ გრატად გამოაცხადა
შემდეგი სტატიაგანათლების სამინისტრო იმ სკოლების ჩამონათვალს აქვეყნებს, რომლებშიც სასწავლო პროცესი შეწყდა