ბათუმში თხევადი გაზის სადგურზე მომხდარი აფეთქების დროს დაშავებული გარდაიცვალა.
როგორც პირველ არხს აჭარის ჯანდაცვის მინისტრმა ზაალ მიქელაძემ განუცხადა, დაშავებული გუშინ მძიმე მდგომარეობის გამო, თბილისის დამწვრობის ცენტრში გადაიყვანეს.
“დაშავებულს სხეულის 90%-იანი დამწვრობა ჰქონდა. გუშინ მისი მდგომარეობა დამძიმდა და თბილისში გადაიყვანეს. სამწუხაროდ დღეს დილით გარდაიცვალა”, – განაცხადა ზაალ მიქელაძემ.
როგორც პირველ არხს დამწვრობის ცენტრში განუცხადეს დამწვრობა იყო სიცოცხლესთან შეუსაბამო და ამიტომაც ვერ მოხერხდა პაციენტის გადარჩენა.
“18 აგვისტოს შემოიყვანეს სტაციონარში. დღეს დილით 8:30 წუთზე პაციენტი გარდაიცვალა. იყო უნივერსალური დამწვრობა, სიცოცხლესთან შეუსაბამო”, – განაცხადეს დამწვრობის ცენტრში.
რამდენიმე დღის წინ თხევადი გაზის სადგურზე აფეთქება მოხდა. დაინგრა ორი საცხოვრებელი სახლი, ორი კი ნაწილობრივ დამწვარია. მძიმედ დაშავდა ორი ადამიანი.
