ვაშინგტონში კაპიტოლიის პოლიციამ კონგრესთან საპროტესტო აქციის 400 მონაწილე დააკავა – პოლიციის პრეს-სამსახური ავრცელებს. დაკავებულთაგან უმეტესობას სამართალდამცველებისადმი წინააღმდეგობის გაწევა ედებათ ბრალად.
Fox News-ის ცნობით, დემონსტრანტები სკანდირებდნენ “ერთი ადამიანი, ერთი ხმა” და “ფული შორს პოლიტიკიდან”.
აქციას “დემოკარტიული გაზაფხული” ერქვა და მისი ორგანიზატორი დაახლოებით აქტივისტთა 100-მდე ჯგუფი იყო, რომლებიც აშშ-ს პოლიტიკაზე ფინანსური კორპორაციების ზეგავლენის შემცირებას მოითხოვენ.
აქცია, რომელშიც რამდენიმე ათასი ადამიანი მონაწილეობდა, 2 აპრილს ფილადელფიაში დაიწყო – ისინი ფეხით ჩავიდნენ ვაშინგტონში. მიუხედავად დაკავებებისა, აქციის მშვიდობიანი ხასიათი ბოლომდე შენარჩუნებული იყო.