პრეზიდენტის ადმინისტრაციის უფროსი გიორგი აბაშიშვილი ეროვნული ბანკის ახალი პრეზიდენტის არჩევის პროცესის წლის ბოლომდე გაჭიანურების შესაძლო სცენარში ვერანაირ ლოგიკას ვერ ხედავს.
როგორც აბაშიშვილმა შესაბამის მოსაზრებაზე კომენტირებისას ჟურნალისტებს განუცხადა, ის გამორიცხავს, რომ პრეზიდენტის მიერ წარდგენილ კანდიდატთან დაკავშირებით პარლამენტის მხრიდან წინასწარი უარყოფითი განზრახვა არსებობდეს.
“მე პრაქტიკულად გამოვრიცხავ ამ სცენარს, რადგან მასში არანაირი ლოგიკა არ არის. გამოვრიცხავ, რომ არსებობდეს რაიმე წინასწარი განზრახვა პრეზიდენტის მიერ წარდგენილი კანდიდატის არდამტკიცებასთან დაკავშირებით, მით უმეტეს, რომ ეს კანდიდატი იქნება კვალიფიციური, პროფესიონალი და ღია პროცესით – საზოგადოების ჩართულობით შერჩეული. ცხადია პარლამენტი იმსჯელებს ამ საკითხზე და მივესალმებით კანდიდატურასთან დაკავშირებით კვალიფიციურ დისკუსიას, მაგრამ არდამტკიცება არც პოლიტიკური მიზანშეწონილობიდან გამომდინარე და არც ქვეყნის მაკროეკონომიკური სტაბილურობის თვალსაზრისით არ იქნება და ვერ იქნება გამართლებული, რადგან ამ შემთხვევაში ჩვენ ძალიან სერიოზული რისკის ქვეშ დავაყენებთ ქვეყნის მაკროეკონომიკურ სტაბილურობას”, – განაცხადა აბაშიშვილმა.
მისივე განმარტებით, საქართველოს ეკონომიკა სერიოზული გამოწვევევის წინაშეა, რისი გათვალისწინებითაც ძალიან მნიშვნელოვანია, რომ ეროვნულ ბანკს ჰყავდეს ახალი ხელმძღვანელი.
არასამთავრობო სექტორის ერთი ნაწილის აზრით, ეროვნული ბანკის პრეზიდენტის თანამდებობაზე გიორგი ქადაგიძის შემცვლელის არჩევა შესაძლოა წლის ბოლომდე გაჭიანურდეს. პროცესის აღნიშნული სცენარით განვითარებას არ გამორიცხავს მმართველი გუნდის ზოგიერთი წევრი, მათ შორის პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური. როგორც მეჭიაურმა “ინტერპრესნიუსს” დღეს განუცხადა, “ლოგიკას მოკლებული სცენარი არ არის, ეროვნული ბანკის ახალი პრეზიდენტის არჩევა წლის ბოლომდე გადავადდეს, როდესაც ეროვნული ბანკის საბჭოს შემადგენლობა განახლდება”.
