მიხეილ ჯანელიძე – არჩილ გეგეშიძისგან ახსნა : განმარტებებს მოვისმენთ და შემდგომ ნაბიჯებთან დაკავშირებით გადაწყვეტილებას ამის შემდეგ მივიღებთ

საგარეო საქმეთა სამინისტრო აშშ-ში საქართველოს ელჩის, არჩილ გეგეშიძისგან მიიღებს ახსნა-განმარტებებს. ამის შესახებ ჟურნალისტებს საგარეო საქმეთა მინისტრმა მიხეილ ჯანელიძემ განუცხადა.

”ამის შემდეგ მივიღებთ გადაწყვეტილებას შემდგომ ნაბიჯებთან დაკავშირებით”, – განაცხადა ჯანელიძემ.

საგარეო საქმეთა სამინისტრომ აშშ-ში საქართველოს ელჩი არჩილ გეგეშიძე მის მიერ გაკეთებული განცხადების გამო თბილისში გამოიძახა. შესაბამისი კომენტარი ჟურნალისტებთან საუბარში საგარეო უწყების ხელმძღვანელის მოადგილე დავით ზალკალიანმა გააკეთა.

”ელჩი გამოძახებულია. ჩვენ გვექნება მასთან საუბარი. ბუნებრივია, ამის შემდეგ დავუბრუნდებით ამ საკითხს”, – განაცხადა ზალკალიანმა, რომელმაც არ უპასუხა შეკითხვას, რამდენად შესაძლოა გეგეშიძის მიერ გაკეთებული განცხადება მისი გათავისუფლების საფუძველი გახდეს.

თავის მხრივ, არჩილ გეგეშიძე თბილისში უკვე დაბრუნდა. ის ამერიკის შეერთებული შტატებიდან წუხელ ჩამოვიდა, თუმცა აეროპორტში ჟურნალისტებთან კომენტარის გაკეთება არ ისურვა.

”კომენტარს არ ვაკეთებ. ტყუილად გარჯილხართ. საგარეო საქმეთა სამინისტროში უნდა განვიხილოთ ეს თემები და ამის შემდეგ გაჟღერდება ყველაფერი, რაც თქვენ გაინტერესებთ”, – განუცხადა გეგეშიძემ ჟურნალისტებს.

აშშ-ში საქართველოს ელჩმა რამდენიმე დღის წინ განაცხადა, რომ პრორუსული ძალები მმართველ გუნდში არიან, მაგრამ გადაწყვეტილების მიმღებ პროცესზე არ მოქმედებენ.

გეგეშიძის აღნიშნულ განცხადებას გუშინ საქართველოს პრეზიდენტმა ”არაკვალიფიციური ელჩის არაკომპეტენტური განცხადება” უწოდა.
”არაკომპეტენტურობა არჩილ გეგეშიძემ არაერთხელ გამოავლინა“, – მიიჩნევს პრეზიდენტი.

banner
წინა სტატიაშიადამიანური რესურსების მართვის სფეროში დასაქმებულ საჯარო მოხელეებს მასტერკლასი ჩაუტარდათ
შემდეგი სტატიასაბურთალოს გამგებელმა ფესტივალ „აი ია“-ს გამარჯვებული ბავშვები დააჯილდოვა