საპარლამენტო უმრავლესობის წევრის ეკა ბესელიას განცხადებით, მათთვის მნიშვნელობა არ აქვს თუ ვინ წარადგინა კანდიდატი, მისი თქმით, მთავარია, კანდიდატი კრიტერიუმებს აკმაყოფილებდეს.
“უმრავლესობას წინასწარ არ აქვს არანაირი პოზიცია ჩამოყალიბებული რომელიმე კანდიდატის მიმართ. ჩვენთვის გადამწყვეტი და მნიშვნელოვანი ხმის მიცემის დროს არ იქნება ის თუ ვინ წარადგინა კანდიდატი, ჩვენ ხმა კანდიდატს ვაძლევთ და არა მის წარმდგენს. ჩვენ კანდიდატები არ შეგვითავაზებია პრეზიდენტისთვის, ჩვენ შევთავაზეთ კრიტერიუმები და ამ კრიტერიუმების დაცვით ველოდებით საბოლოოდ კანდიდატების წარმოდგენას და შემდეგ შეჯერდება პოზიციები”,-განაცხადა ბესელიამ
შეგახსენებთ, რომ უზენაესი სასამართლოს მოქმედ თავმჯდომარეს უფლებამოსილების ვადა თებერვალში ეწურება.
უზენაესი სასამართლოს თავმჯდომარეობის კანდიდატად თსუ-ის ლექტორი ირაკლი ბურდული, საპარლამენტო უმრავლესობის წევრი თინა ხიდაშელი, საია-ს ყოფილი ხელმძღვანელი ანა დოლიძე და “თავისუფალი დემოკრატების” წევრი შალვა შავგულიძე არიან წარდგენილი.
თავმჯდომარის კანდიდატურები საქართველოს პრეზიდენტმა პარლამენტს უნდა წარუდგინოს.