უკრაინა გაეროს უშიშროების საბჭოს დროებით წევრად აირჩიეს 2016-2017 წლისთვის – ამის შესახებ ინფორმაციას სააგენტო “როიტერი” ავრცელებს. იმავე პერიოდის მანძილზე საბჭოს წევრებად არჩეული არიან იაპონია, ეგვიპტე, სენეგალი და ურუგვაი.
მიმდინარე წელს არამუდმივ წევრობაზე ხუთი ქვეყანა იყო პრეტენდენტი, ამიტომ მათი არჩევა არავისთვის ყოფილა სიურპრიზი. ყველა სახელმწიფომ გლობალური ორგანიზაციის 193 წევრი ქვეყნების ორი მესამედი ხმის დაგროვება შეძლო.
დროებითი წევრების არჩევა ორ წელიწადში ერთხელ ხდება: ყოველ წელს 5 ქვეყანა. მათ ვეტოს უფლება არა აქვთ. გასულ წელს იმავე სტატუსით არჩეული იყვნენ ანგოლა, ვენესუელა, მალაიზია, ახალი ზელანდია და ესპანეთი. ათი დროებითი წევრის გარდა გაეროს უშიშროების საბჭო 5 მუდმივი წევრისგან შედგება: რუსეთი, აშშ, ჩინეთი, საფრანგეთი და დიდი ბრიტანეთი.