სტიქიის შედეგად დაღუპულთა რიცხვი ათამდე გაიზარდა

თბილისში მომხდარი სტიქიის შედეგად, ამ დროისთვის არსებული ინფორმაციით, დაღუპულთა რიცხვი ათამდე გაიზარდა, – ამის შესახებ “თაიმერს” კრიზისების მართვის საბჭოდან აცნობეს.

მათივე ინფორმაციით, დაღუპულებს შორის არიან მაშველებიც. ზუსტდება დაკარგული მოქალაქეების რაოდენობა. საბჭოს ცნობით, თბილისის საავადმყოფოებში რეგისტრირებულია 36 დაშავებული ადამიანი. მათგან 16 მოქალაქე სხვადასხვა მოტეხილობებით რჩება სტაციონარებში. მათ სიცოცხლეს საფრთხე არ ემუქრება.

“ქალაქის ზოგიერთ მაგისტრალზე მოძრაობა შეზღუდულია. მოძრაობის ალტერნატიული მარშრუტები განთავსებულია შსს-ს ვებ-გვერდზე. ჩამოწოლილი მეწყერის შედეგად, კვლავ ჩაკეტილია წყნეთი-ბეთანიის დამაკავშირებელი საგზაო მაგისტრალი. მეწყერის შედეგად გარე სამყაროს მოწყვეტილია სოფელი ახალდაბა. სოფელში ჩარჩენილი დაახლოებით 180 ადამიანს დღესვე მიეწოდება სასწრაფო ჰუმანიტარული დახმარება, რაც მოიცავს სასმელ წყალს, საკვებს, ჰიგიენურ საშუალებებს, საბნებს და ლეიბებს. რაც შეეხება ზოოპარკიდან გაქცეულ ცხოველებს, მათი რაოდენობა ზუსტდება. ზოოპარკის ხელმძღვანელობა ახორციელებს დაღუპული და გაქცეული ცხოველების აღრიცხვას, რის შესახებაც მოსახლეობას მყისიერად მიეწოდება ინფორმაცია. ამ დროისთვის, მოსახლეობას მოვუწოდებთ მტაცებელი ცხოველის დაფიქსირების შემთხვევაში დაუყოვნებლივ დაუკავშირდნენ ცხელ ხაზს – 112-ს. სტიქიის ლიკვიდაციისთვის პრემიერ-მინისტრის ხელმძღვანელობით შექმნილი საგანგებო შტაბი უწყვეტ რეჟიმში მუშაობს. ყველა ადგილზე მობილიზებულია ტექნიკა და ცოცხალი ძალა. ამოქმედებულია ყველა რესურსი. ადგილზე იმყოფება ყველა შესაბამისი სამსახური და ყველაფერი კეთდება სტიქიის შედეგების შეძლებისდაგვარად მოკლე დროში ლიკვიდაციისთვის. ცხელ ხაზზე შემოდის მრავალი სატელეფონო ზარი და მოქალაქეები გამოთქვამენ სამაშველო-გაწმენდით სამუშაოებში მონაწილეობის სურვილს. საგანგებო შტაბი მადლობას უხდის მოსახლეობას გამოჩენილი თანადგომისთვის. თუმცა, უნდა განვაცხადოთ, რომ ამ ეტაპზე სახელმწიფო საკუთარი რესურსებით ახორციელებს სტიქიის შედეგების აღმოფხვრას. იმ შემთხვევაში, თუ საჭირო გახდება დამატებითი რესურსების მობილიზება, მოსახლეობას ამის შესახებ მიეწოდება ინფორმაცია და ეს პროცესი განხორციელდება ორგანიზებულად”,- განმარტავენ უწყებაში.

banner
წინა სტატიაშიბიბისი: წყალდიდობა თბილისში
შემდეგი სტატიამიხეილ სააკაშვილი განცხადებას ავრცელებს