თბილისის საკრებულოს სხდომაზე ვიცე-მერის თანამდებობაზე ლაშა აბაშიძის კანდიდატურის დამტკიცებას უყრიან კენჭს, – ამის შესახებ ჟურნალისტებს თბილისის საკრებულოს თავმჯდომარის მოადგილემ გიორგი ტყემალაძემ საკრებულოს ბიუროს სხდომის დაწყებამდე განუცხადა.
“დღეს საკრებულოს სხდომაზე გაიმართება მსჯელობა, რათა მიეცეს თანხმობა საკრებულოს მხრიდან ვიცე-მერის თანამდებობაზე ლაშა აბაშიძის დანიშვნას. რაც შეეხება უმრავლესობის პოზიციას, ვფიქრობთ, რომ ლაშა აბაშიძე არის პროფესიონალი, გამოცდილი კადრი და მას მხარს აუცილებლად დავუჭერთ”, – განაცხადა გიორგი ტყემალაძემ.
თბილისის ვიცე-მერის თანამდებობა ვაკანტური მას შემდეგ გახდა, რაც თბილისის მერის მოადგილე დიმიტრი ქუმსიშვილი ეკონომიკისა და მდგრადი განვითარების მინისტრად დაინიშნა. რაც შეეხება ლაშა აბაშიძეს, ის ვაკის გამგებლის თანამდებობას იკავებდა.