რუსეთში გამოქვეყნებული ჩინოვნიკთა დეკლარაციების მიხედვით, გასულ 2014 წელს, რუსი ჩინოვნიკების მეუღლეთაგან ყველაზე მეტი შემოსავალი ვიცე-პრემიერ ალექსანდრე პრიხოდკოს მეუღლემ, ნატალიამ მიიღო.
დეკლარაციის მიხედვით ნატალია პრიხოდკოს შემოსავალმა 119,5 მილიონი რუბლი (დაახლოებით 2 მილიონი დოლარი) შეადგინა, მაშინ როცა მისი მეუღლის, ვიცე-პრემიერ პრიხოდკოს შემოსავალი გასულ წელს 10 მილიონ რუბლს არ აღემატებოდა.
შემოსავლების მიხედვით მეორე ადგილზე გავიდა რუსეთის კულტურის მინისტრის ვლადიმერ მედინსკის მეუღლე მარინა – 82,4 მილიონი რუბლით.
გასულ წელს ყველაზე ცოტა თანხა გამოიმუშავა რუსეთის შსს-ს მინისტრის ვლადიმერ კოლოკოლცევის მეუღლემ, ვერამ – 72,9 ათასი რუბლი, ხოლო პრემიერმინისტრ დიმიტრი მედვედევის ცოლს, სვეტლანას საერთოდ შემოსავალი არ ჰქონია, აცხადებს რუსული მედია.