შინაგან საქმეთა სამინისტრომ პროსტიტუციისთვის ადგილის გადაცემის ბრალდებით ერთი პირი დააკავა.
გამოძიებამ დაადგინა, რომ 1994 წელს დაბადებულმა, ჩინეთის სახალხო რესპუბლიკის მოქალაქემ ჩან შუენი ჩ.-მ ქუთაისში, ჭავჭავაძის გამზირის N 33-ში ფართი იქირავა, სადაც ე.წ. ჩინური მასაჟის სალონი გახსნა. იგი სალონში მომუშავე, ჩინეთის რესპუბლიკის მოქალაქე ქალბატონებს, გარკვეული ანაზღაურების სანაცვლოდ, ფართს პროსტიტუციისთვის გადასცემდა.
ე.წ. ჩინური მასაჟის სალონის ჩხრეკისას ამოღებულია პროსტიტუციის შედეგად მიღებული 2 ათას 895 ლარი.
სამართალდამცველებმა სალონში მომუშავე პერსონალი მოწმის სახით დაკითხეს. ოთხი ქალბატონი პროსტიტუციისთვის დაჯარიმდა. გამოძიება საქართველოს სისხლის სამართლის კოდექსის 254-ე მუხლით, პროსტიტუციისთვის ადგილის გადაცემის ფაქტზე მიმდინარეობს.
შეგახსენებთ, რომ ქუთაისში ეს ამავე ბრალდებით დაკავების უკვე მეორე შემთხვევაა. იგივე ფაქტზე რამდენიმე დღის წინ ჩინეთის მოქალაქე თბილისშიც დააკავეს.