იაპონიის ოფიციალურ დოკუმენტებში “გრუზიის” ნაცვლად საქართველო “ჯორჯიათი” იქნება მოხსენიებული. აღნიშნულ საკითხზე კანონმდებლობაში შეტანილი ცვლილებები, ძალაში აპრილში შევა.
თუმცა კანონმდებლობაში შეტანილი ცვლილებები ჯერ პარლამენტის უმაღლესმა პალატამ უნდა დაამტკიცოს. დასახელების შეცვლის თაობაზე ოფიციალური შეთანხმება 2014 წლის ოქტომბერში, ტოკიოში საქართველოს პრეზიდენტის გიორგი მარგველაშვილის ვიზიტისას იქნა მიღწეული.
საქართველომ იაპონიას დასახელების მოთხოვნით ჯერ კიდევ 2009 წლის მარტში მიმართა. მაშინდელმა საგარეო საქმეთა მინისტრმა გრიგოლ ვაშაძემ იაპონურ მხარეს განუმარტა, რომ იაპონურ ენაში არსებული ქვეყნის დასახელება, რუსულიდანაა ნათხოვარი და მისი შეცვლაა საჭირო.
თავდაპირველად ოფიციალურმა ტოკიომ საქართველოს, ამ თხოვნაზე უარი უთხრა. იაპონიის მთავრობა შიშობდა, რომ ასეთი ცვლილება გაურკვევლობას გამოიწვევდა, რადგან საქართველო შესაძლოა, აშშ-ის შტატ ჯორჯიაში არეოდათ. ტოკიოში ასევე არ სურდათ დასახელების ცვლილებით გამოწვეული ხარჯის გაწევა, თუმცა საქართველოს მთავრობის დაჟინებული მოთხოვნა საბოლოო ჯამში გათვალისწინებული იქნა. ტოკიოში გაითვალისწინეს ის ფაქტიც, რომ საქართველოს “ჯორჯიათი” გაერო-ს წევრი უმეტესი ქვეყანა მოიხსენიებს.
